早前喺業績會幾乎封口嘅恒隆地產（101）主席陳啟宗，對住內地媒體就生猛返晒，上個月仲做咗個訪問，內容豐富到夠劏開做三篇文、攤開成個月出，收官之作噚日終於出街。
反對派為反而反搞亂香港、英國人臨走之前特登埋下啲政治地雷「伏」偉大嘅祖國、泛民把持教育界為禍下一代，呢類建制派同溫層至理明言當然走唔甩。不過，難得陳生都勇於喺同溫層提出異議，自爆曾經同某位最高領導人指出香港嘅統戰工作做到一塌糊塗，而對方係意識到呢個情況，不過啲手下響操作層面就好大問題。仲有主權移交咁耐，愛國愛黨陣營連一個受到香港老百姓普遍尊敬嘅政治人才都冇。
其實統戰成敗呢點，華華想幫統戰部平反。諗返半年前，後生仔以北上吃喝玩樂為榮、留港消費為恥，喜茶、抖音、大灣區冇乜人抗拒，嗰時又冇乜人讚統戰部厲害，現時氣氛180度轉變，香港俾陳生講到變埋反共基地咁大隻鑊，統戰部未必孭得住喎。除咗外國勢力、統戰部同泛民，陳生係咪講漏咗某個關鍵人物？希望下次業績會陳生肯開金口講吓啦。
李華華
mailto:LiWaWa@AppleDaily.com