粉藍丙：好傷心……班小朋友，本來好可愛嘅小朋友，點解變成咁㗎？小魔怪呀！喺學校門口，或者上埋山頂拖手成人鏈咪夠囉，做乜嘢事上街做炮灰啫？呢啲大人嘅嘢，等大人解決由佢哋上前線，你哋仲係好細個，後面做吓啦啦隊咪算囉……
群組裏面嘅深黃甲即搶答：廢老呀你……十幾歲學生、我老母七廿幾八十歲都明白大是大非過你呀！學生少年都上街，表示年紀輕輕都醒覺；點解死就一世、唔死就大半世嘅你都唔明白啫？革命係要犧牲㗎，你班人仲係停留喺為Ferragamo甩踭而哭泣閉翳咁落後嘅年代？冇㗎啦，仲有廿七年，其實等唔到十年都冇㗎啦……
跟住又係喊到收唔到聲！
深藍丁：阿黃，盲㗎啦你；眼盲、腦盲、心盲，全盲！好心睜大雙眼睇吓個世界，睇吓富強嘅中國，唔好停留、自戀喺殖民地時期，以為英國人當我哋係人咁對得我地咁好啦！喺倫敦讀書行過南區酒吧，班白皮豬就問：中國雞女，幾錢隻呀？當我係灣仔、舊時石崗軍營附近錦田酒吧區嘅蘇絲黃？搭巴士，死老鬼婆當眾鬧黑人滾返黑鬼非洲，見我個黃皮膚一齊鬧埋：死返去你哋個F××king China……同佢講我係香港人，佢話：低等公民！
這之後，發誓讀完書即返香港，死都唔留番喺英國，寧做中國鬼，都唔做英國狗！
粉藍丙即答：係呀係呀，我阿叔話80年代初，戴卓爾夫人北京人民大會堂樓梯跪低之前，英國讀完書返香港工作，有日律師樓嘅鬼仔同事約佢去德己立街頂，舊時仲係幾層西式洋房，中間有個露天Court Yard嘅Mad Dog英式Pub Happy Hour，點知阿叔先到一步，入面好大班紅鬚綠眼望佢嘅冷漠眼神……即係：你入錯門口，行錯地方呀，細佬！
自少英國讀寄宿學校大，以為自己半個鬼仔嘅阿叔，從未在英國得過如此種族歧視待遇，點知返到屋企香港卻遭受奇恥大辱，心下一寒，永遠難忘，即刻連個鬼妹拖友都斬纜！
綠色靚姐同我分享完幾乎日日沒完沒了嘅姊妹對話／對罵：相識四分一個世紀啦，各自講出心中理念、信念，總比收埋收埋，然後暗中割席強；仍然能夠爭執，即係底線「和而不同」，香港嚟到咁嘅田地，呢班朋友都算係咁㗎啦，希望佢地緊記曾經說好：無論如何不割席！