立法會明日就正式復會，「理論上」同日應該係特首林鄭月娥去立會宣讀新一份《施政報告》嘅日子，不過777當日係咪真係敢現身立會讀施政報告？連佢自己都唔敢講實，更有指林鄭早已喺禮賓府預先錄製宣讀短片，以便當日一旦入唔到立法會，就可以當Plan B頂住，但其實有心要入立會讀施政報告，總有辦法，好似政府已嚴陣以待為當日保安做好準備，除咗立法會外噚日起已大舉佈防，立法會議員毛孟靜仲喺facebook發帖話，噚日中午於立會地底停車場，已經有成棚政總保安嚟「視察」嗰條疑似可直通政總嘅秘密車道，毛姨姨質疑是否要保證林鄭可以喺周三安全地由特首辦潛入立會。
毛姨姨撞破實地視察
其實立會一直話地底停車場有秘道可直通政總，有傳6.12當日建制議員就想用呢條秘道返立會開會審送中惡法，毛姨姨同八方講，噚日下午佢喺立法會停車場開車離開期間，發現平日都有鐵欄相隔、連接政府總部同立法會嘅「秘密」車道，突然有立法會保安同警員的共12人係度現場視察，佢又引述立會保安同佢講，有關巡視屬警方喺立法會復會前嘅「例行工作」，毛姨姨就質疑警方有關工作係想令林鄭可以喺周三避開立會外示威，由秘道潛入立法會宣讀《施政報告》，咁即使周三出面有乜嘢槍彈亂飛、催淚彈放題，都唔關佢林鄭事。
李八方