隔籬靚姐嗰班朋友大大話話相識起碼廿年，份屬好姊妹，跟她一直保持密切交情。
最近跟我短訊聊天，話班姊妹各自呻到樹葉都落晒……
深黃甲：阿姐，知你六月幾次百萬人上街，都有去，肯定同我一樣都係黃絲先同你講咋（不過我乜色都唔係，千祈咪幫我歸類，浪奔浪流，隨波逐流人云亦云，唔係我嗰科。）唔明幾個姊妹癲咗咁，好撐唔撐撐班黑警，班黑警無良㗎，見人就打，721元朗警黑合作打人警冇人，831死咗唔知幾多人太子冤案一定要查個水落石出；呢排咁多人被跳樓自殺、被跳海浮屍，仲使乜叉嘢獨立調查，一睇就知道黑警所為，唔使問……
中國人就嚟嚟㗎啦，廿七年咋，唔為自己都為下一代，叫佢地點喺極權國家做人？諗吓都打冷震呀！你估人人都有條件去移民，聽講今次運動之後，外國收緊對香港人移民申請，怕收咗啲中東難民咁，尾大不掉，要斬腳趾避沙蟲喎；我哋係香港人，愛香港，如非不得已，邊個想走？
嘩嘩啦啦……喊到豬頭咁，我信佢㗎，百分之三百愛香港㗎！
綠色乙：係，我有上街，仲行到對Ferragamo高踭鞋踭都甩埋，同巿民大眾嗌口號嗌到聲淚俱下，全因林鄭無良，當時強橫送中不聽巿民聲音，卻不完全贊成其後沒完沒了嘅攬抄，尤其某啲日子交通停頓，唔使拒搭都冇地鐵，上星期去完遊船河，喺尖沙咀天星碼巴士停駛，的士……You Kidding，慘過往昔內地人來港購物潮，邊有的士俾我地啲港人搭呀？簡直兵臨城下，以為打仗呀。
話我係黃絲？
咪講笑啦，不過一介女人仔，淨係想返屋企湊仔煮飯畀老公屋企人食咋，仔女嘅將來？搞掂今日先算啦！
個菲傭Maria啲屋企人話菲律賓經濟好過以前，香港咁亂隨時沉淪慘過馬尼拉，叫佢一係返家鄉，一係去新加坡打工咁話！諗吓都發癲呀，冇咗個菲傭慘過林鄭唔落台，都唔知點樣Run個家！（明續）