有藍絲朋友傳來一段錄影，係一位所謂YouTuber嘅評論，聲言（如果佢公司或有關係之公司）僱用新人嘅話，中大生永不錄用，2019至2024年中大畢業生一於唔請。藍絲話：「你係中大佬，點回應？」有乜好回應啫，呢個評論員個名從未聽過，不知何許人也。香港到目前為止勝在還有言論自由，佢鍾意噏乜咪噏乜囉。不少藍絲叫中文大學做「中文暴徒大學」，簡稱「暴大」，此外號最近不脛而走，點知引起一啲14、15歲初中生仰慕，話考DSE希望入到「暴大」。
左丁山參加過學生運動，假假地係一名「溫和派學生領袖」，知道為學生爭取權利，要因時制宜。1960年代，校長身份非同小可，不可亂叫，直呼其名，當然今日係21世紀，十八九歲大學生有佢地自己一套想法與辦法，極難勸佢地用左丁山嗰一代嘅軟功。想當年，黑警橫行，在旺角字花檔收規，路人皆見，毫無避忌；有事俾雜差捉咗，用半呎厚電話簿放在疑犯心口，連打十幾搥，疑犯內臟受損，邊度有得投訴？今日時代進步，到處係手機拍照拍video兼錄音，疑犯可以投訴，加埋有廉署，疑犯嘅人權先至有得保障。故此當年1967暴動後之大學生，好怕被誤認為左仔，俾警察拉去打幾搥，搞運動係溫和啲嘅。
時代是進步的，在三流英國文官（陶傑話嘅）麥理浩總督管治下，香港人權民權大躍進，廉署成立令警察形象大改，從受鄙視變為受尊敬，點知回歸祖國後，在考第一之港大一流學生林鄭轄下，香港警察竟然畀市民「問候」，都幾慘情。
老早講過，反送中條例運動令警民互恨，警媒互憎，彼此已有信用鴻溝，負最大責任當然係林鄭，佢痛心被捕人士每多十幾歲初中生、高中生，覺得痛心云云，你唔知信唔信。中學生拉唔晒嘅，三四年後盡入「暴大」嘅話，僱主真係統統唔僱用？全世界都係咁，參與學運嘅學生多數係精英學生，有思想，有創意，有組織能力，係21世紀大企業最想聘用之人。學運大時代躲在圖書館讀書嘅，他日後會成為學究，或在大公司成為忠實執行官而缺乏領導能力。中文大學創校以來有「包圍校長傳統」，李卓敏住在漢園被學生坐在門前示威，當時學生領袖之一係羅祥國（後來做過立法會議員及全國政協），帶盲人上街爭取權益，在天星碼頭瞓街嘅有鄭海泉（後來滙豐大班，行政立法兩局議員，中大校董會主席），一位在維園參加反貪污捉葛柏之崇基學生，俾威利警司扑頭，後來成為上市公司主席；馬臨校長時代，力阻馬臨座駕不能行前嘅係王維基，今日商界大名鼎鼎，以後高錕、李國章、劉遵義、沈祖堯都有被學生包圍紀錄，沈祖堯最親民，所以冇咩緊張，前星期喝問段崇智嘅中大生，講唔定30年後會係另一位政商界名人，啲小人物話以後永不錄用中大生，損失嘅可能係佢地自己。