蒙面法一推，夏蕙姨在面書大大聲呼救：「我好亂呀！以後我化厚妝，會唔會畀人罰2萬5仟大元㗎？入差館嗰陣，會唔會畀人摸我㗎？當我係驅風聖藥咁咪大件事？啋！」眾人大樂，爭相分享，我這種養在深閨的「足不出戶」，短短數小時內也收到三次，受歡迎程度可想而知。該煨啊，街上警察搜查疑似戴住五官掩飾物伺機作怪的「暴徒」，佢肯定仲驚過范冰冰，被冤枉的或然率高到冇保險公司受保，可能要洗心革面（呃，「洗面革心」至啱），放棄歷史悠久的生活習慣。數年前旅居巴黎的M女士返港公幹，在銅鑼灣見到個濃妝艷婦，以為自己邂逅李麗華，我因為不信盛傳健康欠佳的長青樹忽然不藥而癒周街濕平，貿貿然擔任潑冷水丑角，上網摷出一張夏蕙姨玉照讓滿眼星星的她過目：「係咪呢個呀？」那款人皮面具式化妝，連心細如塵的國際級電影剪接聖手都分不出甲乙丙，何況打人打到目光渙散的警察，隨時將黃大仙頭炷香專業戶當成戴上另類面罩的十二歲女童，捕之而後快事小，企圖粗暴扯下不存在的面具事大。
這宗網絡趣聞結局並不美滿，花容失色的當事人現身澄清，面書大多數時候由經理人處理，她本人冇大家想像中咁黃。吓，唔係啩，咪話我知早期《100毛》那個令人頻頻捧腹的專欄也由槍手代勞，這太殘酷了，簡直辜負了美麗的BB封號。不過在愁雲密佈的時候，得啖笑總比冇得笑好，譬如前幾天金城武的正義宣言，不出二十四小時證實純屬誤會，沉醉在溫馨回憶的舊粉可管不了那麼多，刷新的綺夢發到唔清唔楚。