喺會所遇到一位好耐唔見嘅會員，姑名之專家S，打過招呼，問佢點解咁耐唔見在會所出現，專家S話：「前年退休後，周圍去旅行，仔女在美國，去探佢哋都住番兩三個月啦。」好正啫，人有專長，老無所求，最是逍遙自在，咁最近去過邊呢？專家S話：「去星馬泰印雲遊，特別到印尼周圍去，由爪哇、蘇門答臘去到婆羅洲，印尼總面積唔算大，但人口已有兩億，到處係高山森林，大島小島，搞基建成本好貴，係一個有潛力，難管理嘅國家。」講起印尼，省起1980年代，遠東經濟評論不時揭發印尼國營石油公司PT Pertamina嘅醜聞，依家好似冇乜人提起咯喎！專家S話：「印尼早年發現石油，大量採油，不止自用，還可輸出，但現在已經採油採得差不多，Pertamina風光不再了，多年前貪污醜聞搞到間公司內部紛亂，依家都要低調做事啦！」
還好，印尼石油可以自給自足，不受油價高漲影響，但啲油價忽高忽低，對石油入口國就好麻煩。專家S話：「中國最是頭痛，今天大慶油田等等，已無多大商業價值，中國日用一千萬桶油，靠外國輸入起碼七百萬桶有多，真是對沖難，不對沖亦難，買SPOT現貨嘅話，每日每桶升五美元，就係3500萬美元。中國加入巴黎協定，承諾要減排，故此不斷要買油、買燃氣。燃氣向俄羅斯買，簽長期供應合約，價格唔公開，國際油氣專家都一致估計係高價貨，明益俄羅斯，所以普京對習近平非常老友，攞晒中國着數吖嘛。中國有大把煤，以後要減低煤炭消耗量，實在不智，冇理由中國在做電池方面已掌握最多天然礦物及最高技術，但電池充電就唔用最平嘅煤電而用天然氣電㗎！」喂，環保大過天喎，凡事都有制約嘅啦！專家S話佢好明白環保政策及國際聲譽之重要，中國有煤炭不用，所以佢認為中國能源專家以後一定會推薦用核電。全國建核電站，減少用油氣，煤炭更只是發電後備原料，如果中國多建核電站，對香港有乜影響？專家S話：「我唔講政治，純講經濟，核電如有剩餘最好賣畀香港，叫中電港燈不必再大舉投資天然氣發電嘞，一家便宜兩家着，兩地可同時減排！」兩家着？諗真啲似乎係內地着數啲，假如此大計成真，香港向內地多買核電，即是香港用戶資助內地核電建設，係一種集資方式噃！唔怪得又有陰謀論，近期嘅供電諮詢有一條係：向唔向內地買電呀？再問專家S：「何解中國要買咁多天然氣？」專家S話：「你唔好詐儍，周永康係石油系統大哥，佢倒台後，抄家抄到幾多現鈔呀？有幾多石油系統大將落馬呀？」