【本報訊】攝影師梁柏堅將於今屆區議會選舉在灣仔大佛口出選，他四年前曾在灣仔區參選但落敗，原決定今屆不再參選，但反送中運動中，他親身經歷包括8.31等警暴事件，改變了原本想法，決心出選守住作為社區第一道防線的區議會，由地區工作開始守護香港，「唔少人對勝負結果好上心，但戴（耀廷）教授講過，啲人投票畀你，唔只當日，仲係一個四年希望，所以之後都繼續有做嘢，有時間都繼續做個社區睇文件，未必開街站但會做社區導賞團，一定知區會啲會議內容。」
原不參選 歷警暴改初衷
他不諱言，本來今屆已決定不出選，並預定繼續跟進社區事務約一年後就淡出，但經歷反送中運動，卻重燃他再參選的意志，「區議會職能之一，係帶民意畀地區主任，再上呈民政事務局，最後畀特首知，但班建制派區議員冇做好本份，劉江華出席社區對談時，好似唔關佢事咁，佢冇收到社區嘅風？唔知市民反對咩？所以建制派唔好扮成受害人，話家陣影響佢哋選情，其實佢哋根本係第一罪人。」
他在今次運動中受僱於網媒，曾在8.31太子站內直擊警察無差別打人，又曾在採訪現場被警察故意從後開槍打中受傷，近距離見證警暴失控，「但呢一切都係源於第一道防線冇咗，個炸彈先爆到咁大，就係一直把持區議會嘅建制派，只會出來支持政府同譴責暴力，根本係本末倒置，大家仲繼續選佢哋，係咪想將來有機會再爆多次？」
因此他在6月尾時，已改變年初不再參選的念頭，「唔可以咁快退落嚟住，唔想呢啲對社會咁大衝擊嘅事再出現」，更何況，他觀察到民情的改變，認為改變社區的一些想法，現時較過去有更大機會實踐，「上屆大家好似有政治覺醒，係咪可以承住傘後嘅勢？但其實大家對區議會嘅期望同過去幾十年差唔多，區議會架構上亦好多嘢做唔到，仲要過半先做到啲嘢。但現時大家開始明白生活同政治分唔開，區議會係咪可以做橋樑而唔係講提供服務呢？經過今次運動，睇到大家好愛香港，可唔可以喺地區上，幫大家帶出呢種對社區嘅歸屬感，咁大家咪會珍惜個社區。」
他更笑言，經歷今次運動不少大場面，可以成為做區議員的一大優勢，「現時幾緊張危險環境都經歷過，你個人會定好多，區裏面有乜事，街坊會安心好多，佢哋會對你有信心，難聽啲，到時畀街坊圍都唔會騰，識得危機處理，冇人氣當衝突係興趣，但你會識同市民表達諗法。」