周日美職煞科日，除咗係各隊爭入季後賽嘅關鍵外，仲係兩大射手卡路士韋拿同伊巴謙莫域嘅金靴爭奪戰。兩大前鋒之前已經有啲牙齒印，煞科戰前仲爭緊今屆神射手獎項，結果效力FC洛杉磯嘅前鋒卡路士韋拿喺贏科羅拉多急流一仗上演「帽子戲法」，力壓伊巴成為神射手，兼以34球刷新美職聯單季入球紀錄。伊巴爭輸之餘，佢效力嘅洛杉機銀河仲以2:4作客輸畀侯斯頓戴拿模，銀河將喺季後賽首圈失去主場之利。
單季入34球美職聯最多
韋拿同伊巴之前已經試過互寸對方，後者就諷刺韋拿喺當打之年就要「淪落」到去美職搵食，而卡路士韋拿就話自己入波的確多過伊巴。不過卡路士韋拿今次就威番，事關佢喺煞科日主場以3:1擊敗科羅拉多急流一仗連中三元，擊敗咗同日都有一球進賬嘅伊巴，以34球壓過入30球嘅伊巴，成為美職聯常規賽嘅神射手，獨佔美職單季最多入球紀錄。
除咗卡拿士韋拿個人破紀錄外，佢效力嘅球隊FC洛杉磯都刷新咗常規賽最高積分嘅紀錄，賽前已經確定係常規賽冠軍，可以免戰首圈直入西岸準決賽，贏波後34場攞到72分，打破咗上季紐約紅牛嘅71分最高積分紀錄；球隊共入85球亦追平咗1998年洛杉磯銀河嘅記錄，不過當時銀河一季只踢32場；佢哋亦打破咗銀河98年另一項紀錄，今季FC洛杉磯以+48球刷新咗聯盟最佳得失球紀錄，舊紀錄係98年銀河所保持嘅＋41得失球。
值得一提嘅係，卡拿士韋拿計埋助攻一共參與咗球隊49個入球，可以話係球隊嘅進攻泉源。
銀河2:4反敗戴拿模
反觀有伊巴謙莫域坐鎮嘅洛杉磯銀河就無咁好彩，先係伊巴全季入足30球都失落美職神射手，球隊煞科日仲作客侯斯頓戴拿模輸波而回。今場伊巴為球隊先開紀錄，不過最終都被對手反勝4:2，賽後跌落西岸第五，令銀河喺首輪季後賽失去主場之利，要作客對西岸第四嘅明尼蘇達聯。