上星期四之林鄭社區對話，相信電視直播收視率打破咗歷史最高紀錄，幾乎全部朋友、校友、親戚都一齊在家睇直播。聽講事先有二萬人上網報名參加，最後抽出150人，再由呢150位幸運觀眾抽出30位發問，可知中獎機率有幾細。但聽勻全場，如果以顏色而論，黃嘅佔極大比例，起碼左丁山覺得只有兩位女士係有親政府言論，其中一位仲畀人揭露本身以前係輔警㖭。如果以此黃藍比例推算，香港人絕大多數係黃，極少數為藍。中大民意調查顯示，贊成設立獨立調查委員會嘅，佔95%，係壓倒性大多數。上星期四晚，發問觀眾有要求設立獨立調查委員會嘅，一位心水清老友計過，共15次，佔發言內容50%，如果特區政府加林鄭真係願意接地氣，聽民意嘅話，設立獨立調查委員會實在急不容緩。
左丁山事後問嗰位心水清老友：「藍絲意見多數認為地產商有責任，解決房屋問題就可以解決青年人示威問題，你又有乜數字？」朋友大笑：「根本牛頭唔搭馬嘴，屈青年人上街示威是為了爭取上樓，未免太過皮毛，點解藍絲唔聽吓世界上除咗住樓之外，還有自由民主選舉呢回事？印尼學生示威有七大訴求，決一不可，唔通又與房屋有關？」唉！中國人權白皮書話明人之最大權利是生存權、溫飽權，似乎只要中國人能夠溫飽，有飯食，有巴黎手袋可以買，就會天然馴服，任由黨中央擺佈，邊個咁得閒同你講民主選舉權。
老友原來有做筆記，佢話上星期四晚，30位發問觀眾有提及房屋問題的，只有兩次，講考慮近岸填海的，只有1次。即是話927之社區對話，民間人士基本上最關注獨立調查委員會，其次係林鄭月娥政府是否管治無能，根本不將房地產掛在心上，但現在政府及建制派就一口咬定要解決房地產問題，考慮引用收回土地條例，直接或間接示意地產商捐農地（唔敢叫更大農地業主──原居民捐祖堂地）。所謂社區對話，到尾就是一場戲，民眾意見總是聽不入心。
藍絲又有一說，話示威暴力係顏色革命，最終想奪權搞港獨。如果鄧小平所言，「一國兩制、港人治港、高度自治」都算係港獨口號，不如叫中共黨中央正式宣佈廢除一國兩制，將香港改制成為上海式嘅國務院直轄市啦！香港區咁多人大政協，不如明年三月就在北京提出此議案！上星期五左丁山返中文大學新亞書院參加獎學金頒發典禮，有幾位穿西裝衣着整齊嘅學生戴頭盔面罩上台領獎後，高呼「光復香港」，台下學生齊呼「時代革命」或「香港人加油」，共發生十多次，聲音震耳，到後來突然台下有一名學生高呼「香港獨立！香港獨立！」點知無人反應，逸夫堂即時鴉雀無聲！港獨也者，其實中大新亞書院學生唔捧場。