湯寶如、彭家麗及駱振偉主持ViuTV音樂節目《Chill Club》，昨日在九展舉行宣傳活動，湯寶如早前曾在無綫主持過《流行經典50年》，今次打對台和ViuTV合作有另一番感受，她直言：「呢個台自由度大啲，我唔係話嗰邊唔大，只係呢邊冇咁多嘉賓，我哋冇咁辛苦，做主持可以唱多啲歌、互動多啲。」彭嘉麗曾因意外令記憶力及組織能力變差，做節目時要多花時間準備，她笑說：「咁都搵我，導演真係大膽，已經錄咗兩集，我覺得自己尚待改進，因為太緊張，轉數又慢。」
駱振偉透露在節目中會唱有同性戀意思歌曲《再見露絲瑪莉》，他自爆：「有次余迪偉當住我女朋友面前，問我係咪基，我都有幻想過，但我發覺冇可能。」駱振偉下星期會飛往丹麥和女友Katrine結婚，二人特意為婚禮學習跳舞，現時最令他頭痛是要應接丹麥傳統，婚後第二日要互送禮物，駱振偉笑說：「女友已經買咗份好貴禮物畀我，我唔可以冇表示，或者我送支cue棍畀佢啦。」兩人婚後返港或會補辦派對和朋友慶祝。
採訪：黃曉妍
攝影：陳俊強