【黑鏡線索】
上次提到，中國每代當權者，都要決定點樣處理香港，到底係迎合大中華膠民族主義，插手香港，抑或放手等香港發揮佢嘅特殊功效嚟利己？
蔣介石自稱民族英雄，不斷想逼英國交出香港。毛主席就力抗民族主義壓力，堅決捍衞兩國兩制，將香港充份利用。鄧小平就想左右逢源，一國之中，實為兩制，用中港區隔，嘗試避免中港矛盾，不過結果繼任人只係搞咗個淘寶版出嚟，仲要連個淘寶版都仲要退化緊。
講返轉頭，中華民族主義，又係點樣走出嚟？
二十世紀前，地球好興帝國，每個帝國，包括眾多族群。一戰前，主要帝國，包括大英帝國，奧匈帝國等等，而東方最大就係大清帝國，當中包括滿蒙漢回等等大大小小嘅族群。
一戰之後，全球步入Wilsonian年代，美國總統威爾遜，開聲撐各民族，有民族自決嘅權利，於是各地捲起創國熱潮，由歐洲到南美到非洲，帝國瓦解，取而代之，係眾多嘅民族國家。到今時今日，昔日帝國版圖，已經唔係咁容易睇到痕迹。
「中華民族」百二年歷史
但有個例外。係，清帝國係玩完咗，但取而代之嘅係乜嘢？
有一條路，係變成多個民族國家，例如漢族有個漢族國家。孫中山開頭嘅口號係「驅逐韃虜」，即係反清復明，革命成功回國第一件事竟然係祭明太祖，可見一斑，佢心目中嘅國，唔係好包所謂嘅外族領土。
另一條路，係完全繼承清帝國嘅版圖，問題係，咁就唔係民族國家，逆世界之潮流，唔係咁講得過去。夾硬嚟，仲有一招，就係將清帝國裏面嘅族群，全部打包成一個「民族」，就咁過關。
毛澤東撐湘獨
創作呢個打包式民族嘅，係晚清最大影響力嘅KOL梁啟超，銅鑼灣條啟超道就係因佢命名。歷史上第一次出現「中華民族」呢個概念，係梁喺1902年提出，冇錯，呢個民族，只係百二年前創立，之前完全冇呢個概念，亦都冇呢個稱呼。
於是就可以既繼承清帝國，但又喬裝成現代國家。有咗呢個故事線基礎，一眾民族發明人，就喺上面不斷叠高，例如佐證民族偉大嘅「四大發明」呀，證明源遠流長嘅「炎黃子孫」呀，民族圖騰嘅「龍的傳人」呀，一層一層搭建上去，越搭越勁，然後納入所有學生必修課程，國民教育將呢個民族發明，發揚光大。
所以係先有繼承帝國嘅需要，後有中華民族發明，但其實民族點劃分，從來都係頗武斷。就連所謂漢民族，有人覺得頂盡只係漢字文化圈，對建設現代國家嚟講，都嫌分得唔夠細。例如民國時期，一位名澤東嘅毛姓湘獨青年，鼓吹所謂「湖南門羅主義」，又放肆宣揚將後清帝版圖，劃分「二十二行省三特區兩藩地，合共二十七個地方，最好分為二十七國」（已FC）。
理直氣壯 情感綁架
當然，中華民族呢個梁啟超自己後期都想割席嘅創作，大家都知，係非常成功，清帝版圖，亦基本上一直未分拆。但係其實唔難理解，一如毛姓湖南自決主義先鋒所預言，夾硬繼承清帝國版圖，會造成乜嘢後遺症同副作用。
自此，中華民族，民族感情，民族罪人等等，變成萬能key，有乜嘢傾唔掂，貼個label上去，就忽然理直氣壯，係情感綁架嘅終極武器。其實由「黃大仙人」到「宇宙人」之間，有好大嘅空間。要先擺脫到一代傳一代嘅惡意情感綁架，就有可能面對真相，呢個係解毒中學中史嘅最重要嘅實際作用。呢個時勢，更加明顯。
撰文：宋漢生