早排八方寫過澳門新特首賀一誠見國家主席習近平，官方新華社發稿唔見咗港澳辦主任張曉明有份，疑似被燉冬菇，親北京媒體立即為小明澄清話冇咁嘅事，仲話係造謠生事，但係真係假有時要放長雙眼睇，好似日前有報道，北京搞「國慶招待會」請台港澳人士，但央視播出畫面又唔見咗小明，難免令燉冬菇傳言又再炒熱。
港澳辦副主任宋哲有現身
中共中央搞呢個「國慶招待會」，據報道由多個部門聯合舉辦，由全國政協主席汪洋致辭，中央外事辦主任楊潔篪主持，聯合舉辦活動嘅部門最高級官員、及全國人大副委員長王晨、副總理孫春蘭、胡春華等都有參加。
原本小明只係港澳辦主任，泊埋咁多領導人一比，好似官方新華社發稿咁，央視播出畫面冇佢咁低級官員唔出奇，但奇就奇在據報央視畫面出現咗港澳辦排名第一嘅副主任宋哲，小明呢個主任反而冇喺畫面出現！咁情況自然引起議論，究竟小明根本冇去所以唔見佢？定係就算有去都唔畀佢係鏡頭前見光？
政圈好事之徒話，呢啲場合唔見小明，反而副主任就喺央視畫面出現，中共點會唔知一定引起猜測，但央視仍然照播，即係小明即使今日未燉冬菇，前景都唔多樂觀，大有可能係等緊時間調走，同時亦反映佢、甚至港澳辦可能已經係港澳政策上靠邊站，對港澳事務冇乜話事權。
李八方