【爆相爆片】今年53歲嘅郭富城同方媛（Moka）結婚後，兩年抱兩，大女Chantelle已經兩歲，今年4月出世嘅細女Charlotte（二寶）話咁快五個月大，讀者黎先生透過《蘋果》「爆相爆片」分享，前日約下午4點喺金鐘出生登記處見到城城夫婦同一女子同行。
黎先生提供嘅短片所見，戴帽嘅城城坐低同職員搞手續，帶黑超嘅Moka本來企喺老公身後，轉個頭就坐喺城城身邊等候。黎先生接受電話訪問時話：「我哋帶囝囝去搞出世紙，見到城城同Moka唔知係咪同細女搞出世紙，佢哋應該網上登記咗，所以一嚟到就埋去12號窗登記，我哋咁啱坐佢隔籬，聽到佢同職員講緊英文名點樣拼音，我哋聽唔清楚佢個名。」根據資料顯示，嬰兒出生後42日內可免費辦理出生登記，之後不超過一年內辦理出生登記手續，須繳付登記費140元。
「唔係唔記得」
另外，城城噚日到W酒店出席保險活動，提起囡囡即甜笑自爆：「佢𠵱家識翻身，眼仔睩睩，同埋佢係肥妹，小朋友肥係好事，我二寶小腿似米之蓮，真係好得意。」至於被見到去攞出世紙，城城話作為一家之主，安排好時間會親自帶BB辦理手續。提到Charlotte已經五個月大，過咗42日要交額外費，城城話：「少少啫，幾百元，罰係要罰，但唔係因為唔記得搞。」佢話非常珍惜同家人相處時間，11月開新戲，之前會爭取時間陪家人。