唔講可能唔知，香港房委會成立於1973年，廉政公署則是1974年成立。當時香港經歷六七暴動，百廢待興。政府絞盡腦汁，致力回應市民基本要求——住屋和法治。
事隔四十多年，我們的政府在土地政策依然墨守成規，repeat又repeat，到底還真的奏效嗎？香港唔夠地，就係人都知，所以不斷提出要填海、收郊野公園、發展棕地、開發新發展區、重置葵青貨櫃碼頭等等。唔係山旮旯咁遠，就係「百無之地」，等政府發展得嚟，可能已經係下幾代的事，正所謂今日唔知聽日事，問你點等？然而，偏偏卻有好多人仍然以為只要有地，就等如有樓。
剛剛新世界3.0鄭志剛話撥三百萬呎地建設社會房屋，其中一項計劃是與社企「要有光」合作建設「光村」。雖則第一期伙數得一百伙，但不得不承認，這種由光房進化至光屋，再昇華至光村的房屋實驗，的而且確比政府所做的更加實際和落地。而且計劃強調關注有小朋友的低收入家庭，特別是如何幫助解決切身需要的這個心思，正正亦是政府房屋政策之中嚴重缺乏的。
今時今日，喺香港生活，絕非單純食得飽、穿得暖、有瓦遮頭就足夠。新生代仲要講求創科及教育配套，除咗要職業配對幫助就業，更要幫助他們由低技術階層「升呢」，唔係是但畀間劏房公屋佢哋住就問題解決兼皇恩浩蕩。
搞房屋搞來搞去淨係識得呻無地，完全毫無創意，姑勿論可唔可以借呢招洗底，扭轉多年來地產霸權形象，但至少夠膽識在亂世殺出一條血路，比起政府和政黨起碼肯嘗試、敢開創。我們不如一齊放長雙眼，睇吓鄭志剛呢場實驗光村，能否變成「光廈」，甚至「光區」，為香港人帶來真正的光明。
文迪晞
mailto:heyadmen@gmail.com