逆權運動以來，年屆71歲的葉德嫻（Deanie）多次現身遊行行列，與港人一起抗爭，爭取民主、自由。Deanie姐透露自己有兩個母親，但因為自小受西方文化耳濡目染，所以聽到父母講歪理時很痛苦，就算被父親責打都不認錯，在父母眼中是個叛逆女孩。直至現在，她依然態度企硬：「爸爸以為大人就大晒。」
撰文︰羅婉玲
攝影：葉君海
葉德嫻早前和蘇玉華在灣仔接受《蘋果》訪問，為首次演舞台劇《親親麗南》宣傳。Deanie姐在戲中是個衰媽媽，談到與父母關係，她說自己是個「乞佢哋憎」的女兒，回望昔日年少氣盛，令她明白香港年輕人堅持抗爭的那團火。早前她更身體力行，參與銀髮族遊行，明言撐年輕人︰「你哋冇做錯。」
原來Deanie姐年輕時是叛逆分子，不容易向大人妥協，所以與父母之間經常產生矛盾，她說：「佢哋講得唔啱我會糾正佢，我細個對住爸爸媽媽，聽埋啲歪理都要點頭，好谷氣、好痛苦，你話我唔孝順都冇問題。」說起昔日成長往事，Deanie姐自爆：「我有兩個媽媽，我爸爸住喺我生母度，我就同大媽媽住，每日爸爸返嚟探吓大媽，佢一入屋就掛住玩貓，我咪行咗去，佢玩完一輪，會向大媽投訴我『點解德嫻唔叫我早晨。』咁點解佢唔同我講早晨呢？」
「以為大人就大晒」
Deanie姐指當時的女人出嫁從夫，對老公言聽計從，不敢反抗。但自小很有主見的她，再遇爸爸等她叫早晨時，態度依然故我，就算被責打都不認輸，她說：「爸爸審我時，問我點解唔叫早晨，我話你又唔叫我早晨。後來佢用尺打我，我伸手俾佢打，佢喊住話未打過細路哥，尤其打啲女，我唔理佢走開咗。到𠵱家問我，我都係話佢唔啱，佢以為大人就大晒。」
在大人眼中，Deanie姐是個不聽話、反叛的女兒，可是她自小生活在西方文化濃厚的小區，耳濡目染，她很buy外國人兩代間的平等相處方式：「我細個住嗰區一半都係外國人，見人哋媽媽會同細路仔講good morning，我爸爸真係老土。」Deanie姐認為父母不應該高高在上，要與小朋友同一個角度去看事物，才溝通得好。
開明態度教子女
自認是個開明的母親，Deanie姐認為對下一代要因材施教：「我好開明，同仔女溝通我會用open嘅方式，但接唔接受又係另一回事，有乜事我會攤出嚟講，唔會擺喺心入面。我唔知自己有冇教錯啲細路哥，可能我都有啲做錯，所以導致佢哋有啲唔好嘅嘢。」其實每個母親都不會完美，但懂得認錯、反省，已證明她是個真心與孩子「對話」的母親。
場地提供：香港藝術中心
化妝︰Stephen Lau of Stephenmakeup（葉德嫻）、Vinci of vinciwinki（蘇玉華）
髮型︰Seiko Sin of Hair Culture（葉德嫻）、Green Cheungof AdmiX（蘇玉華）