德國總理默克爾（圖）上星期訪華，仲同中國總理李克強傾香港問題，默克爾喺聯合記者會不點名提到《中英聯合聲明》協議繼續有效，又話要避免暴力衝突，必須透過政治對話解決問題。默克爾咁公開講香港，北京梗唔高興，所以之後內地官方喉舌《環球時報》發社評消毒，話默克爾講香港只不過係向德國同西方輿論交差。
默克爾輿論非交差
不過唔少政界中人唔係咁睇。有民主派人士話，德國政府一直好關心香港反送中情況，特別係警察被指違反人權對付示威者，因德國人對納粹、東德共產政權違反人權打壓異見深惡痛絕，只不過德國政府唔同美國政府做事方法，習慣先做後講。
德國駐港領事館到噚日亦係fb發文，引述上星期嘅報道，話默克爾喺記者會上呼籲尋求和平解決香港問題，《基本法》保障香港公民權利同自由，有政界人士講笑話，唔知德領事館係咪想藉此反駁《環時》，佢哋嘅總理講香港問題，唔係好似《環時》講，只係向西方輿論交差咁簡單？