上周五國際足球友誼賽，巴西喺美國邁阿密約戰哥倫比亞，結果靠事隔3個月正式復出嘅尼馬一傳一射，逼和對手2:2。尼馬喺呢場波先開角球助攻卡斯米路頭槌建功領先，之後俾對手半場前連入兩球反超前，佢喺下半場接應老拍檔丹尼爾傳送，幫巴西扳平2:2完場。呢位巴西球星今個夏天一直因為轉會傳聞，冇幫過巴黎聖日耳門（PSG）上陣，但家陣轉會窗都閂埋，佢都係返唔到巴塞隆拿，巴塞會長巴杜美近日就講到明，下年一月轉會窗唔會再同PSG就尼馬交易糾纏落去，仲叫佢乖乖地留喺巴黎多一年先，去到出年夏天再諗方法。
另外，巴杜美亦有講到近日被踢爆季尾可以自由身離開巴塞嘅美斯，證實佢合約中真係有提前一年可以免費走人嘅條款，但就深信對方唔會走。