近日與國際地產專家測量師L閒談，問佢物業市道如何，測量L話：「用一個特首常用字解釋最好，就係暫緩，目前一切暫緩，客戶聲明話並非撤回，投資物業仍可趁市道調整，伺機吸納，但要講到扑槌成交，就一於暫緩，睇多一兩個月先。」
目前情況陷於僵局，特首有中央撐腰，官媒打氣，一於寸步不讓，實不知如何建構對話平台。對話平台最初由唐英年發起，特首唔睬，其後建制派議員逐個微調態度，對成立獨立調查委員會並不抗拒，而且夠膽公開倡議，如張炳良、林大輝、曾鈺成等等，甚至強硬派葉劉淑儀亦有轉軚跡象，於是林鄭開始放風話要對話，不過對乜話啫，聽其言，觀其行，出入禮賓府者，全是建制派，都唔知有乜好講。
法國黃背心大示威，燒車、搶名店之後，總統馬克龍畢竟係人民選出來的，為平息局勢，用和解方式嚟「止亂制暴」，首先向黃絲帶訴求讓步，然後展開全國大辯論，親自出席全國城鎮論壇，總統噃，首先退讓一步，於是黃背心之亂，逐漸平息，有望達成和解。反觀香港，特首林鄭傲慢如昔，聲聲指責，每開一次記者會，就招來更多怨憤，點搞呀，唔通要馬克龍干預「內政」，教佢幾招咩！
測量L話佢地國際企業，一講呢啲嘢就好敏感（按：其實係國泰效應，北京大棒打落，政治與商業混雜不可分，係國際企業最怕嘅。），只肯講地產，於是問佢外資來港投資物業，既然一切暫緩，那麼有乜生意好做？測量L話：「好彩還有香港人去英國買樓，東南亞買樓，生意唔錯，可以幫補吓！」佢話自中美貿易戰以來，人人話越南好，今越南地價樓價（胡志明市）急升，曼谷受歡迎，吉隆坡唔錯，新加坡太貴，又有辣招，不宜買入，因英鎊下跌，不少港客認為有水位，買英國一手樓嘅樓花日漸流行，總括而言，就是目前香港之外資不來（暫緩），外流資金則有不少。但佢所憂慮者，並非有關樓價下滑而係驚今天社會當打人才（35-45歲），即未來十年之香港接班人，亦相繼流失，Human Capital之損失比金錢資本損失還要影響深遠。呢個年齡階層人士移民，比較受外國接納，尤其是專才，另外，因1980年代移民潮影響，香港大約有接近一百萬人擁有外國護照，呢批人一旦回流澳紐英加，香港好可能出現商界專業界人才斷層情況，特首如何面對？唉，眼中只有北京之人，多數係視若無睹啦。