在會所餐廳飲茶，鄰枱幾位客人大談「𡃁仔唔識死，受人誤導」，一聽便知是討論六、七月以來嘅遊行示威及街頭衝擊。回頭一望，幾位先生女士似是四五十歲中年，有男有女，其中一位男士儼如導師，主導討論，又似凡事皆懂，講講吓，變成一人演講。
凡此場合，當然要靜心聽聽，不可忍耐不住，與人駁嘴，那位先生，似是藍營，但聽其言論，似已陷入一套北京八股，即（一）示威有人煽動，有人派錢；（二）𡃁仔唔識艱苦，不肯奮鬥向上；（三）美國佬是黑手，背後搞搞震；（四）美國佬要打壓中國興起，利用一切不利中國的手段，香港反修例就是食得唔好嘥，搞大佢，令中國受困擾。
幾個月來，呢套八股聽過不少，即使對方係留學美加嘅商界精英，亦深信不疑。左丁山問過一位精英：「點解係相信𡃁仔收錢做嘢，美國佬搞搞震？有乜證據呢？」答案係美國佬見中國興起，眼紅，要「破壞中國」，因此派錢搞破壞。即係咁，最終嗰套解釋就係美國妒忌，要維持美國霸權，不容中國挑戰，故此咁咁咁。
如以此為大背景，誤解香港年輕人容易受美國代理人發功，受CIA操縱，故此必須嚴厲鎮壓，絕不姑息嘅話，實在可悲。林鄭讀社會社工，當年不知有冇讀過輔導學，今天年輕人明知（一）與警察對抗，實力懸殊，搏鬥輸梗；（二）被捕被拉要坐五至十年監，一生前途被毀；（三）令父母惶恐不安，眼淚汪汪；（四）異性朋友可能拜拜而去，愛情變悲情。但佢地仍然一於不怕催淚彈，海綿彈，與武力裝備強大嘅警察「死過」，所為何事，這是何等心態，大學嘅心理學家，社會學家要對香港有貢獻，最好從速做年輕人行為心理研究。建制派已經封閉了心靈與頭腦，已成為思想懶人，呢類人不會學習英美加澳嘅中年商界精英有自由思想嘅，中共宣傳已入腦，CIA是萬惡之首，世界上到處是CIA，凡洋人朋友都可能係CIA；其次，自己拼命勤奮工作只為錢，以金錢為工作動力，就以為其他人示威也是為了錢，也不問如果冒坐五年十年監之險，而衝擊警察，要收幾多錢至啱？收錢行事之人，一見勢色唔對就閃啦，邊會與警察對峙8小時咁笨？總而言之，北京研究美國，分析對策，好失敗，本港建制派等而下之，更是迹近文盲，胡亂引用甚麼顏色革命，基本上除咗錢和受CIA煽動，建制派就是不懂世界上還有其他誘因令年青人向前衝。