【財經專題】
新界部份偏僻地方如無王管，以貨櫃屋搭建、屬違規的「貨櫃樓盤」遍地開花。《蘋果》記者日前佯裝顧客，相約多間貨櫃屋公司「睇盤」，有貨櫃屋竟建於元朗新田的魚塘上，變身「水上貨櫃屋」，室外有水鄉風情，室內面積1,000呎，內裏傢俬冷氣一應俱全。屋主甚至在魚塘上打樁、配置戶外無邊際泳池，住得舒適。不過有消防專家直言，貨櫃屋結構無經消防風險評估，易招祝融；有測量師則擔心貨櫃屋經不起強風吹襲，隨時「冧櫃」。
記者：潘曦
記者日前放蛇，聯絡一間位於元朗沙下村附近的貨櫃屋公司，表示有意委託其建造貨櫃屋。甫進門，王姓男負責人便將記者帶到場內一個空貨櫃作簡單介紹，其後再返回辦公室，展示過去為客戶所打造的貨櫃屋住宅圖片。
建200呎屋需五萬多元
「一個20呎乘10呎貨櫃，大約五萬二蚊，25呎乘10呎的話，就六萬幾蚊。睇你要幾大面積同幾多層，我哋可以幫你打通。元朗呢邊好多人都幫襯我哋起屋做住宅㗎，你哋諗得到點整，我哋統統做到。」
說得興起，王先生更故作神秘，指可駕車帶記者參觀一個在元朗新田剛建成的「示範單位」，惟該單位的保密工夫十分到家，即使駕車仍需要輾轉穿過多條沒有路名的泥地小巷及矮樹林，才能到達。甫下車，只見有五個貨櫃改裝成逾1,000平方呎的「大單位」，恍如大澳棚屋一樣，屹立在魚塘上，甚具水鄉風情。「呢間屋係我近期嘅得意之作，要抽乾一半魚塘嘅水先可以打樁做到出嚟，仲要好小心，免得地政同環保署留意到。」
貨櫃屋內大廳用兩個20呎乘10呎的貨櫃打通，甚為寬廣。兩扇大窗面向魚塘及矮樹林，景觀絕佳。「牆身加咗隔熱板，夏天唔會好熱。電箱嗰啲我哋仲可以幫你申請埋，包冇問題。」其後他展示屋內兩間卧室、衣帽間及獨立浴室等地方，並自讚其重金設計豪裝的貨櫃屋，與別不同。
貨櫃屋外還裝有無邊際泳池。「遲啲打完樁，裝埋個泳池上去，再放返早前抽乾嘅水落魚塘，個景就會好靚㗎啦。」此時，貨櫃屋女戶主亦出來「幫口」：「王生間貨櫃屋公司手工好好。」惟當記者問及在魚塘上建貨櫃屋是否合法，她則吞吞吐吐指：「都係博吓博吓㗎咋，我諗政府唔發展到就唔會收，我都好大風險㗎。」
遇投訴吊走貨櫃避風頭
元朗違建貨櫃屋情況猖獗，亦有位於沙頭角的貨櫃屋公司，打造「一條龍」覓地建屋服務。「你冇地起屋唔緊要，我哋有相熟地主可以租地畀你，喺大尾督嗰邊，月租都係8,000蚊左右。不過係農地嚟，全部都要『偷雞』起嘅，唔可以張揚。」沙頭角貨櫃屋公司負責人張小姐邊展示貨櫃屋住宅圖片，邊力銷佯裝顧客的記者，指承造一個200平方呎「住得人」的貨櫃屋，只需約5萬元。
「亦可以將三、四隻貨櫃叠高變複式，喺屋內或外，整條樓梯上落，好穩陣。不過一般農地只可以起單層，倉地先可以兩層。」
其後張小姐更教路，如何避開政府部門檢控。「你先喺農地放一、兩個貨櫃『試水溫』，過三個月冇附近街坊投訴，你先慢慢起。我哋幫你用高圍牆圍起間屋，加埋鏡面玻璃，喺外面睇唔到你。」她又再拍心口稱，即使貨櫃屋被揭違法，其貨櫃屋公司亦可替顧客先吊走貨櫃，放於其他地方，「只需要千幾蚊，當冇事風聲冇咁緊，想要番又可吊番畀你！」