【本報訊】深水埗警署前晚遭大批市民包圍，要求釋放浸大學生會會長方仲賢，直至昨凌晨警方清場再爆衝突，九人被捕，包括沙田區議員黃學禮，他被指襲警及非法集結，被捕其間與警員唇槍舌劍。黃至昨晚10時才獲准保釋。
語無倫次喝罵：我都有納稅
昨凌晨1時許，警方驅散示威者，並於長沙灣政府合署外制服黃學禮，指他涉嫌襲警及暴動，警員以索帶綁起其雙手，其間黃高聲表明身份，並稱自己只是到場協助市民，無任何襲警動作，在場警員質問「你見唔到人射彈珠咩？」又呼喝黃「你同法官講啦！做騷呀？」現場記者詢問在場白衫警官，是否確認現場曾發生暴動，惟對方無回應。
黃稱自己被警方無理拘捕，再被在場警員大聲斥責「議員唔可以知法犯法，知道唔知道！」「區議員大晒！唔使守法嘅！」黃隨即詢問「我企喺度犯咩法？」惟警員沒正面回應，繼續喝罵黃「你辜負市民期望，犯咗法，襲警」、「我對你好失望！我都有納稅，我都有投票，我都係香港人！」另一名警員稱，「沙田區議員，呢度深水埗！」
黃向傳媒透露，接獲沙田街坊求助指被困深水埗，到場了解期間遇上清場，黃當時身處行人路邊，被10多名警員按於地上，並用盾撞擊左耳，指他涉襲警及暴動。他指自己沒任何襲警舉動，批評警方反應過份緊張。警方其後改以涉嫌非法集會罪名，將他帶署扣查，至昨晚10時獲准以1,000保釋，9月中旬向警方報到。
■記者黎志偉