張致恒（Steven）上月因自爆已為人父而被揭一腳踏五船，噚日中午約12時，佢抱住愛犬同未婚妻雯雯喺旺角出現。雯雯抱狗仔先上車，Steven話狗仔因為打交受傷，要睇獸醫。對於被前度爆料，佢唔想提：「要回應都喺Ig回應咗，唔多講。」問佢心情點，佢苦笑一下︰「沉澱緊，希望將來做得更好。」講到紅館演唱會檔期𠵱家由BOYZ拍檔關智斌單拖做，佢話：「放下心頭大石。」
稍後出埠拍戲
問當初有冇諗過公佈婚訊會搞到咁大鑊，Steven話：「係人都要結婚，加上我覺得自己要負應該要有嘅責任。」佢承認之前貪玩，但有咗BB，覺得係時候要醒，為家庭努力。問佢有冇經濟困難？他大笑一陣後話：「唔講咁多呢啲。」佢話同公司有聯絡，之前都有安排工作，稍後會出埠拍戲。
下月結婚唔擺酒
雖然之前發咗聲明，但外界覺得Steven欠誠意，問佢會唔會喺鏡頭前再道歉？佢深呼吸話：「呢個時勢咁亂，香港咁亂，唔想講咁多嘢，因為我嘅事搞到大家混亂，我只可以同大家講對唔住。」問同雯雯嘅婚期？佢話：「低調搞，下個月嘅事，暫時唔會擺洒。」Steven之後帶狗仔坐車去太子睇獸醫，45分鐘後雯雯抱狗，Steven就攞住兩大包狗糧返屋企，佢話狗仔只係耳仔發炎。
採訪：黃曉程、馬建華
攝影：林賓尼、梁繼光