烏拉圭星科蘭舊年嚟香港踢波，幫傑志贏完17/18港超聯冠軍就走咗，一直冇再落班，以為佢一早掛咗靴，但原來唔係，事關佢噚日先正式宣佈結束球員生涯。換句話講，傑志係佢最後一間球會，港超聯係佢最後一個冠軍！
拎過世界盃金球獎
家陣40歲嘅科蘭喺獨立隊出道，踢過曼聯，喺維拉利爾真正踢起，成為歐洲頂級射手，之後踢過馬德里體育會同國際米蘭，喺亞洲都踢過大阪櫻花同孟買城。2016年離開孟買城後停咗一年工，18年年初先嚟傑志。講到科蘭喺港超嘅表現，雖然又未到好勁，但喺對標準流浪射入嘅超靚罰球，相信球迷都一定記得，而佢球員生涯最後一場波，係舊年5月13號嘅港超煞科戰，傑志喺旺角場以2:0贏元朗，佢冇入波，踢咗56分鐘由費蘭度入替。之後佢去咗電視台講世盃，就再冇落班。
科蘭噚日喺twitter確認自己退役：「21年後，我決定結束職業足球員生涯。喺一個充滿美好回憶同激情嘅階段結束，但另一個新挑戰將會開始。感謝所有喺呢條路上陪伴我嘅人。」佢接受《Telemundo》訪問時話︰「真係唔易㗎，我唔想呢刻嚟到，但要嚟嘅始終會嚟，我已經決定終止職業球員生涯。」科蘭係烏拉圭前國腳，總共為國家隊上陣112場、射入36球，佢嘅代表作當然係10年世盃幫國家攞到殿軍，自己仲擸埋金球獎。
黃洋林嘉緯齊祝福
一代世界級球星掛靴，兩位同科蘭做過隊友嘅港超聯球星都同求大俠講，祝福佢咁話喎！「大哥」黃洋就話：「我對佢嘅埋門、控球、處理單對單嘅能力最深刻。另外，佢喺訓練時嘅準備工作同訓練後嘅自覺加操，都展現出佢嘅專業態度。我喺佢身上學到最多嘅，係不論任何年紀，都仲對足球有熱忱。可以同佢成為隊友係好大嘅光榮，希望佢退役後繼續喺足球圈發光發熱。」舊年轉咗會去東方龍獅嘅傑志前副隊長林嘉緯就話：「我好欣賞佢嘅射術，雖然佢係世界級球星，但係都好主動同我哋溝通，祝佢有一個美好嘅將來。」我求大俠都喺度講聲：「Diego，wish you all the best！」