文字真係一種藝術，「觀星雷射筆」改一隻字，變成「雷射槍」，即刻變成大殺傷力武器，牆都射得穿咁款。不過就搞到八方個心好亂，因為成枱文具又原子筆又螢光筆，使用不當都一樣致命，咁會唔會隨時被克警當有個軍火庫？前晚網民聽到浸大學生會會長方仲賢因為買咗十支雷射筆，就被差人指控藏有攻擊性武器，都好擔心筆筒或櫃桶嗰堆中華牌鉛筆、原子筆、塗改筆，會唔會統統變成「鉛槍」、「原子槍」同「塗改槍」。亦有絲打話嚇到個心離一離，因為成屋都係化妝槍同眼線槍呀。
火機放大鏡極致命
八方仲喺YouTube發現一段相信震驚三萬香港克警嘅片段，就係將眼鏡放喺陽光下聚焦，轉眼就可以燒着張報紙，威力比得上佢哋示範支「雷射槍」，咁一眾四眼仔女會唔會到時配副眼鏡都被休班警截查先？同樣係四眼嘅黃國桐律師就好嬲同八方講，質疑克警亂嚟，市民以後係咪連火機同放大鏡都唔買得，只要整得着火都隨時被克警話係武器？又究竟克警話「觀星雷射筆」係「雷射槍」，其實吹大幾多？
八方請教過有「港版神探伽利略」稱號嘅工程師盧覺強，原來佢都有睇警方個直播，仲笑話「唔知企後多一米，張紙會唔會穿呢？」盧覺強話係筆定係槍呢，其實要睇束光有幾大能量，又話實驗室嗰啲夠勁喇啩，1,000到3,000毫瓦，用嚟切嘢都得，但佢哋都唔會叫佢做槍！而講到底，其實外界係質疑克警懷疑知道方同學係浸大學生會會長而郁對方，如果係普通一條阿茂買，相信買十箱克警都唔會理！
李八方