香港造就不少地產富豪，亦有人堅持實業。「超人」李嘉誠外甥查毅超（圖）有「磅秤大王」之稱，由經營雜貨打拚，到鑽研計算重量尖端科技，拒絕沾手地產項目，更斥資收購法國磅秤企業拓展業務，成為香港「磅秤大王」，「買幢大廈今日可能值30億，但我冇後悔過，磅王呢個名得來不易」。
客戶包括航空母艦
查毅超接受本報專訪時，提到福田集團由塑膠起家，後來發展至雜貨生意，磅秤僅是其中一項電器，竟然被他發揚光大，「接手家業頭五年，我做過好多古靈精怪嘢，機械磅、無線滑鼠，最早期讀信用卡晶片嘅機仔、發熱電子花灑，好多係OEM（代工生產）嚟。我睇到磅冇乜人做，廚房磅好低端㗎，日本城可能70至80蚊隻啦」。
幾條生產線中只有磅秤能維持生意，「我見到有啲行家做廚房磅，我覺得我哋準過佢哋喎」，繼續鑽研技術，甚至收購全球第二大家用磅產商法國公司Terraillon，再延伸至高端科技傳感器。
很多人會疑問，家用磅近乎低科技，價錢便宜，有甚麼厲害之處？原來磅秤核心技術是量度重量的傳感器，除應用在醫療及工業，「最先進嘅傳感器，會應用喺軍工，例如軍用直升機，喺支桿到度力嘅；我哋有客係核動力航空母艦，要度住艦底睇吓有冇突然變化，例如好大力撞佢，有嘢唔妥，度力唔一定用傳統感應器」。
查毅超指傳感器其中一種技術是光纖，首先將三色光纖依附在目標物件結構上，「你一拗彎佢，條wave link（波動線）就會變，咁咪知道個力」。
舅父李嘉誠從塑膠廠起家，成香港一代首富，地產是不可或缺一環，不過查毅超未有參與，「當年係可以有機會買入一幢中環商業大廈，現時可能值30億，咁我用嚟買法國磅秤公司，𠵱家梗係唔值30億啦，但我冇後悔」。
查毅超笑言：「做咗30年嘢，過去好多業界龍頭，我94年已經過佢哋頭，人哋叫我磅王，係得來不易。」問到有沒有向李嘉誠「偷師」營商哲學？「少傾呢啲嘢，同老人家傾閒偈，盡量唔傾生意，大家又冇生意來往」。
記者：周家誠