【黑鏡線索】
一個城市，因為百幾年前嘅原因，移交到一個帝國手中。城市同帝國，骨子裏好難加得埋，係人都知，就連帝國嘅偉大舵手都知，所以佢先會搖身一變，做埋偉大設計師。設計啲乜？咪係設計一個方案，去解決兩樣嘢根本上加唔埋嘅問題。
最終，偉大設計師度咗個方案，叫一國兩制，大家拍手叫好，話人類從來未有過呢個方案，咁都諗得出，真係天才。問題係，從來未有人試過嘅方案，唔試返幾十年，又點知好work？所以大家當時所謂嘅好work，唔可能係話個方案真係解決到問題，work嘅意思，係大家信會work，收貨，令個兼併可以得體咁去馬。
資訊自由vs資訊封鎖
咁而家過咗22年，個方案實際work唔work？你問吓香港人，問英國政府，問強國統治集團，好難想像，今時今日咁嘅情況，有邊個會真心相信，偉大總設計師個設計好work。到底係設計出問題，定係執行出問題，定係執行者水平必然會令設計走樣嘅問題，定係以上皆是，就未有明顯共識，唯一共識，係件事唔work。
朋友話，反送中發展到呢一步，成件事嘅核心，係資訊自由。粗疏地分，兩個世界，一個係資訊自由嘅世界，一個係資訊封鎖嘅世界。香港，不嬲係自由世界嘅一員。而強國則係封鎖世界嘅領袖，數碼列寧主義嘅先驅。
今次運動，喺資訊自由世界發生，市民有得用自救網上三寶，telegram、連登、FB live，強國政權強烈感受到冇得屈市民機嘅壞處，應該好慶幸一早喺強國裏頭實行資訊封鎖。CCTVB等媒體剪嘅片，喺香港發揮嘅作用，比特區政權想像細好多，所以不斷誤判，不斷下試道德底線，反而喺強國國內就好使好用，有效操縱人民反對呢個「肛毒」運動（唔係端傳媒講，都唔知有呢個term）。
好多人問，到底點樣先可以去返以前嘅香港。問題係，點樣定義以前嘅香港？如果有齊數碼列寧三寶：監控燈柱、社會信用評級，同埋防火長城，就算畀個獨立調查委員會你，係咪就可以當係冇事？換句話講，如果香港告別自由世界，被吞併入資訊封鎖，數碼列寧嘅世界，FB、Twitter、IG上唔到，打機要用實名，like錯嘢要扣分，焗住袋張身份證去監控自己，接唔接受得到？
英治時代保護 未走上逆權路
為咗減低統治成本，政權有好大誘因，去繼續將香港拉入資訊封鎖世界，同其他嘅大灣區城市睇齊。就算撤回送中，搞埋獨立調查委員會，打破警黑共治，都仲有有關資訊自由同高科技監控嘅一連串政策，不斷或明或暗咁壓落嚟，到咗今時今日，越來越多人發現，政治本身就係冇得避，全世界一直都係咁，只不過喺英治時代，當南韓台灣等小龍捱緊逆權長路，香港受殖民保護而唔係好覺，The price of freedom is eternal vigilance。
撰文：宋漢生