鄭秀文（Sammi）紅館演唱會昨晚休場，今晚會繼續演出，而前晚嘉賓係謝安琪（Kay）。Sammi以「最索人妻」介紹Kay出場，然後Kay攬實Sammi話：「好正呀，雖然成日睇你演唱會，但未試過咁近，可以攬住，好正呀！」全黑打扮嘅謝安琪同Sammi合唱《默契》，再唱一首《喜帖街》。
屋企都搽
Sammi喺台上話大家一定好奇佢同Kay嘅關係，話其實佢哋私下係好朋友，Kay對住Sammi話：「你真係好好……」Sammi即反問：「有幾好？讚嘅說話唔怕講喎！」Kay就話：「我份人好怕醜，唔係好主動嘅人，你第一次同我講祝福說話又為我禱告，嚇死我，我真係受寵若驚，同埋你好真心，台上台下私下傾偈都係咁真摯、咁用心……我想喊！」
Kay又話生完BB後，有日Sammi突然去探佢，佢心諗點解Sammi個人咁好，好到晏晝嚟佢屋企，仲要着到鬼火咁靚，成身紅卜卜又搽晒紅唇。Sammi笑住話：「係呀，我落街倒垃圾都係咁，而且我平時喺屋企都搽紅唇膏。」Kay回憶當日全家都好緊張，所以印象好深刻，Sammi即講笑：「你奶奶好熱情，我哋傾咗好耐，其實我都想走，佢幾乎想請我食埋消夜！」Sammi又講笑話𠵱家想請年紀比自己大嘅女歌手做嘉賓唔容易，所以今次決定請一啲年紀比自己小，甚至係新人合作，Sammi話：「喺新歌手身上我學到好多嘢，我都鍾意同新樂手、樂隊、rapper合作，佢哋帶畀我新靈感。」
撰文：馮仁昭