阿積士隊長馬菲斯迪歷特周二晚已經抵達咗都靈，而且喺周三已經做埋體測同簽約，正式加盟意甲冠軍祖雲達斯。祖雲達斯喺球會官網上載咗呢位19歲荷蘭後衞抵達都靈嘅片段同相，坐私人飛機抵埗嘅迪歷特落機之後即刻同祖記球迷打招呼，仲喺條片度話︰「祖雲達斯球迷大家好，我係馬菲斯，好開心嚟到呢度呀。」迪歷特上季帶領阿積士打入歐聯四強，今夏可以話係世界足壇最炙手可熱嘅年輕球員之一，曼聯、巴塞隆拿同巴黎聖日耳門（PSG）等歐洲大球會都想將佢收歸旗下，不過佢最終決定加盟祖記。據報道，迪歷特嘅轉會費高達6,750萬鎊（約6.5億港元），會同祖記簽約五年。