今夏同利物浦約滿後回復自由身嘅前鋒史杜列治，周二就喺ig度放咗幾張相同片段，話自己喺美國洛杉磯嘅屋企被三個男性賊人爆格，除咗被人偷咗四個袋之外，廚房嘅門窗都被人打碎埋，最慘嘅係史杜列治嘅愛犬亦都失咗蹤。痛失愛犬嘅史杜列治事後就拍咗條片，話為咗搵番隻狗，佢願意畀高達2萬至3萬鎊（約20至30萬港元）嘅獎金，又好明確咁表明錢唔係問題，就算匪徒帶住佢隻愛犬返嚟，佢都願意畀懸賞，可見史杜列治同愛犬感情真係好深厚。佢喺ig度亦都上載咗好多張失蹤愛犬嘅相，希望洛杉磯市民可以幫手留意吓，又話自己好快就會搬走，唔會再留低喺呢個傷心地。