鄭欣宜前年在老闆蕭定一的支持下成立自家音樂廠牌，開始自主製作歌曲，惟後來遇上老闆蕭定一母公司陷入財政危機，製作全面煞停。最近欣宜重新出發，推出新歌《救命歌》，是她自去年9月後再有新作推出。等了又等，捱過這段日子，欣宜明白要隨遇而安，學懂將負面情緒抒發。
欣宜日前在尖沙嘴接受《蘋果》專訪，對於過去10個月沒有歌推出的日子，她覺得十分漫長，就像過了一輩子，而且心情相當複雜，她說：「大家都知道過去一年發生咗好多問題，亦知道（蕭定一）個情況係點，坦白講製作上當然影響到我，始終做歌需要錢，當然呢個情況冇人想，所以過去呢一年我冇刻意同佢去反映自己好耐冇出歌。」
「好多嘢冇得Plan」
雖然沒有宣之於口，但欣宜坦言心情越來越焦急：「開始有啲fans喺網上留言問我做乜咁耐唔出歌，坐的士時司機哥哥都會話你唱歌好聽，點解唔再唱？我惟有答好快㗎喇。」她又表示入行後見識到娛樂圈變化萬千，好多事都不可以計劃，她說：「好多嘢冇得plan，只能學識見步行步，坦白講其實我都仲未識得處理，唔開心一定會有，自己會諗之前遇到《女神》呢隻歌得到唔錯成績，亦都攞咗一啲獎項，但點解之後嘅路好似仲難行咗。」
威偶遇小歌迷
新歌《救命歌》MV遠赴挪威拍攝，欣宜表示要感謝導演莊少榮，指對方用去當地放假的私人時間幫她拍MV。她更透露在當地一間香港人開設的中餐館遇到難忘事，原來老闆娘囡囡是她的小歌迷，對方趕來餐廳見她，還開心得哭起來。
經過挪威之旅沉澱後，欣宜表示已開始明白要隨遇而安，同時會學懂將負面情緒抒發，她說：「就好似呢首歌咁，其實係講有時唔需要去裝強悍，需要時係可以喊出嚟，亦係可以去尋求幫助，咁樣先係正確嘅做法，所以呢首歌嘅出現對我嚟講亦係來得好合時。」
撰文：曹家誠
攝影：陳慧安
場地提供：LE 39V Restaurant Hong Kong