呢排一班民主派區議員都好忙，除咗支援各區「反送中」運動，繼續要解答街坊嘅奇難雜症，而最近佢哋處理最多嘅難題，相信都幾一致：點樣可以訂閱《蘋果》呀？其實《蘋果》自7月初推出訂閱制以來，有唔少人因為冇信用卡未能課金而用唔到《蘋果》app睇新聞，八方近日都收到「三無的獨居者」來信（圖），話自己冇信用卡、冇電子支付、冇往來戶口，有嘅只係一本紅簿仔，咁嘅情況下，如何交費？
冇信用卡都可以課金
呢班《蘋果》嘅「三無」支持者，唔係只申訴、冇建議，佢哋有提及，可唔可以好似繳交水、電、煤氣費咁，自動轉賬：「我們每天10元支持《蘋果》過日﹙晨﹚」，而封信仲附有一封利是，入面有100蚊，「附上少少心意支持訂閱」。八方收到真係好滾動，可惜來信人冇附回郵地址，未能聯絡提供幫助，八方會將心意轉交《蘋果》慈善基金。
各界有關訂閱嘅意見，《蘋果》已經收到，八方嘅同事必定致力協助解決，亦簡單講吓，冇信用卡嘅讀者，可以先下載八達通app，開通當中虛擬預付卡O! ePay Mastercard，然後按「轉入」增值，最常見有呢3種方法：
1.八達通：用NFC相容手機（如Android、Samsung）用實體八達通拍卡「轉入」；
2.現金：到7-11出示八達通app，按「轉入」用現金經QR code增值（最少增值額為$50）;
3.轉數快：從銀行戶口過數「轉入」；
增值之後，就可以虛擬預付卡O! ePay Mastercard訂閱《蘋果》動新聞。
讀者如有任何查詢，可以打電話到顧客服務部電話：2623-9985或3717-9468，同事會幫大家忙。