巴西前鋒尼馬嘅父親透露，佢個仔將會喺下周一歸隊向法甲豪門巴黎聖日耳門（PSG）報到，並且會出席季前操練，又指球隊喺多個星期之前已經知道尼馬呢個決定。尼馬周一冇去到球隊第一日嘅季前練習，PSG當時就話會對呢位巴西前鋒採取「適當行動」。尼馬爸爸話：「我哋周五同周六都要去拍廣告同去福利機構度做嘢，球會都知道佢過去五年都係咁。」新任PSG體育總監李安納度就強調會處分尼馬。尼馬喺2017年以破世界紀錄嘅2.22億歐元轉會費由巴塞隆拿加盟PSG，據報球會只要啱價就會放人。近日網上亦都有尼馬喺巴西踢沙灘足球，同埋佢同艾法美路喺巴塞隆拿行街嘅片段流出。