英超球會狼隊宣佈，簽入香港出生、早排曾經跟過中國國奧隊集訓嘅英籍中場戴偉浚，合約期為兩年，將會為狼隊U23出戰。19歲嘅戴偉浚喺香港出世，先後喺東方青年軍同香港巴塞足球學校學法，2012年去到英國加盟雷丁，其後轉戰貝利，仲喺17年首度晉身貝利一隊。佢舊年轉投牛津聯，但上陣機會唔多，季中外借到荷甲球會烏德勒支，代表青年軍出戰荷乙。戴偉浚有代表香港資格，港足前主帥加利韋特就曾經將佢列入初選名單，但最終戴偉浚話自己有傷冇入到決選大軍，但同時被人發現佢去咗荷蘭同中國國奧隊集訓。戴偉浚月初已經同狼隊U23訓練，今個周末亦會隨大軍去西班牙集訓。狼隊U23主教練羅拔艾華士讚戴偉浚融入得唔錯，話佢充滿力量，但同時話戴偉浚要努力嘗試追上一隊水平。