曼聯喺周一已經抵達澳州展開季前賽之旅，球隊周三就舉行咗次記者招待會，領隊蘇斯克查就講到球隊為季前賽嘅備戰工作，最大焦點當然就落喺盛傳要求轉會嘅中場保羅普巴度，同埋早前影到佢同連格鬧交嘅事。蘇斯克查就表示︰「外界對我哋啲球員都有好多猜測同講法，對我嚟講呢啲事真係好普通，曼聯嘅夏天就係會出現呢啲情況。我有同普巴、盧卡古、拉舒福特以及連格傾過，到目前為止我哋未收到其他球會嘅斟介，亦冇必要去賣走任何球員。普巴件事成為咗傳媒焦點，但佢係頂級又專業嘅足球員，從來都冇咩大問題。連格同普巴喺街度講幾句，外界就寫係打交衝突，但其實佢哋一啲問題都冇。」佢仲指出球隊仲未停止增兵嘅步伐，希望會以一支更強嘅球隊迎接新一個球季。