「鬆糕」同「大眼姐」拍拖時相當高調，早幾年結婚仲搞咗個盛大婚禮，哄動到不得了，而佢哋兩公婆婚後亦被視為圈中恩愛夫妻。兩年前，大眼姐為鬆糕生咗個囝囝，一家三口好幸福，而事業上，大眼姐雖然結咗婚生埋仔，但一樣咁紅，經常被內地邀拍節目同做代言人，甚至拍電影，總之工作幾乎冇停過，而鬆糕婚後生意越搞越大，財源滾滾來。
不過，唔知係咪佢哋兩個事業太好太忙，所以兩公婆見面少咗，感情變淡，所以兩個感情出現問題，多年婚姻亮起紅燈。近期大眼姐同鬆糕不時傳出婚變，雖然鬆糕同大眼姐早排一齊出席公開活動，似乎想以行動粉碎婚變傳聞，但Jessie姐聽老友講，佢哋其實已經分開咗。
話說大眼姐好耐之前簽咗做某個品牌做代言人，品牌份合約寫明要出席幾多次活動，以及訂明要同鬆糕一齊亮相某個電視台節目，早排節目方面就聯絡大眼姐，相約佢同鬆糕一齊出席節目錄影，以及諗住傾吓詳情，點知大眼姐嗰邊就覆番電視台，話佢同鬆糕已經分開咗，所以唔能夠一齊錄節目，即係話，佢哋嘅童話故事原來已經結束咗。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。