最近積極為舞台劇《但願人長久》排練的李蕙敏，其實她自身的故事也幾乎可以拍一齣《尋親記》。她21歲由家人告知是被收養，親口告訴她而一直與她很親近的父親，原來沒有血緣關係。
她說多年來，斷斷續續收到不同人的信件，說是她的親生父母，不料每次去到要做親子鑑定這一步的時候，對方就停卻下來。李蕙敏說：「最後都做唔到，又話算喇，咁我就覺得OK，如果對方係咁，就算係（親生）都係整定啦，所以我成日都信係有命運囉！」
有失必有得，不完整的家庭，自從她13年嫁給英國老公Serge Micallef後，修補了缺口。「自從我有家庭，開始補足咗我心靈上一啲虛位。」
婚後積極造人卻不成功，人工受孕亦不果，兩人決定領養小孩。今年將50歲的李蕙敏，由以往對情人唱沒有好結果的怨婦，變成今天不怨天尤人的幸福熟女。
撰文：文嘉龍
攝影：陳俊強
同老公個世界融合咗
李蕙敏說，申請領養小孩的手續過程漫長，並不是想像中簡單，「都好多嘢㗎，由你開始辦手續，要同有關機構好多接觸，佢要了解你好多背景資料，甚至係你心理上嘅狀態，係咪心理上同physically（生理）都準備好，呢啲嘢佢哋都要探討得好深入，同埋有好多聚會去了解你，直情好似心理醫生咁！」
她試過在聚會過程中忍不住喊了出來。「其實對我嚟講都幾困難㗎，因為我哋做呢行，我自己又比較慢熱，我幾難同一啲陌生人一開始就講一啲自己嘅嘢，佢哋仲要『撩』得好深入，所以最初好尷尬，講講吓屋企自己又忍唔住感動就喊咗出嚟，但係都冇辦法，呢啲係必經嘅階段，既然你想做呢件事，唔好諗咁多啦！」
老公和她一樣，希望領養的小孩可以由細開始一起生活。「我哋大家都希望係從細個一啲開始，希望大家建立嗰個關係，嗰個bonding（聯繫）好啲啦！」幾時可以正式領養？「未㗎，唔知幾時，可能突然間好快都唔奇㗎！其實都已經過咗兩、三年㗎喇呢個過程，所以我估唔會太耐嘅！」
難得的是，身邊總有老公陪伴面對。李蕙敏與從事銀行業的英國老公Serge Micallef邂逅於中環的jazz club，「我好鍾意嗰個地方，同埋嗰度有香港最好嘅musician，甚至係外國嚟香港表演嘅musician，佢哋一完咗騷就會落去jam㗎喇，係一個好精采嘅大合奏！嗰個地方幾特別，我又好鍾意去，咁就遇到佢囉，其實佢又好鍾意音樂喎！」
婚姻為李蕙敏的人生帶來了不少轉變，她說：「轉變係大嘅……佢同我係兩個世界，加埋習俗文化，同埋佢嘅性格、佢嘅圈子啦，佢嘅朋友家人佢嘅工作啦，反而佢嘅工作我唔係100%了解，但係同佢嘅世界融合咗，係幾得意嘅，我自己又會再開朗啲啦，因為佢好好笑，儍儍哋又幾樂觀，佢令到我輕鬆咗，因為我個人其實一做嘢就好容易緊張大師，有時又可能over thinking，但係佢會令我relax啲，叫我可以退後一步諗，唔係一定要咁緊張！」
腦退化養母係Angry Bird
有了自己家庭，李蕙敏說令她自細對家庭的不安全感得以彌補，人生缺口修補了。「自從我有家庭，開始補足咗我心靈上一啲虛位，令我覺得嗰個窿係冚到嘅，我開始緊我自己新嘅家庭喇，即係唔需要再諗我以前嘅家庭係點囉！其實好多嘢係睇你點睇，如果你成世人淨係諗住我心靈上係有一個缺口，咁永遠都會有，我唔係話可以完全當冇事發生，咁梗係唔得啦，但係起碼喺呢個moment，我講起呢啲嘢，我唔會好似以前咁容易覺得hurt，或者咁容易想喊囉！」
她的心靈缺口，來自她被收養的歷史，21歲從父親口中告訴她是養女身份，消息當年經媒體曝光後，李蕙敏隨即收到不少尋親信件。「知道咗我係被收養之後，其實有好多人寄信去我公司，有幾百封最少，話可能係同我血緣有關，大家問我應該點，我又唔知道要點決定喎，死啦點算呢？唔好理住喇，咁就冇理住喇！跟住on and off有啲人出現，到咗後期又有啲人出現，係有想踏入呢步嘅（親子鑑定），但so far即係，點講呢……又好似唔係特別好有誠意咁，我去到呢個過程又擱置咗。」
始終大家有緣無份，「結果係做唔成㗎，所以我信緣份囉！因為你知做DNA鑑定都有指定嘅程序，要攞一啲你嘅樣本。最後都做唔到，又話算喇，咁我就覺得OK，如果對方係咁，就算係（親生）都係整定啦，我成日都信係有命運囉！」
親生父母未有緣見，唯一的養母還是要照顧的。從小李蕙敏就與生性火爆的「母親」感情疏離，常常被她打鬧，所以李蕙敏好早離開家庭自立，與養母關係近年才破冰。「其實係因為爸爸走咗，同埋自己大個咗，睇開咗！爸爸走咗嗰十年係我最唔開心嘅時間，除咗我要處理自己嘅心情之外，我都有好多時間要take care佢（養母）去睇醫生。」
患有腦退化症的養母百病纏身，「老人家有好多唔同嘅病，眼又睇過、肺又睇過、心又睇過，跌親又有，總之好多事，中風又有、『通波仔』又有！我覺得係因為佢年紀大喇，咁關係好唔好唔重要啦，就當我盡我嘅能力令到佢老人家喺最後嗰一程，可以盡量好啲啦！由我不斷帶佢去睇醫生，令我有好大嘅體會，我睇到好多醫院嘅人，其實人老咗呢，你有幾叻都好，其實都係一樣，大家都係無能為力，好彩就行得走得有人照顧，唔好彩其實都幾sad㗎！」
凡事看開一點，她現在學識要用一種嬉笑怒罵的方法去對待有腦退化症的養母，「因為佢都係Angry Bird嚟㗎嘛，不嬲都係，佢到𠵱家都仲係好好中氣，係唔係都鬧一餐！好犀利㗎我媽媽，我咪有時笑吓或者當佢係細路咁樣囉！腦退化係佢對遠嘅記憶好似好清楚，佢成日講番某一啲事，但係其實有啲我係唔知嘅，近嗰啲事呢？佢有時又認到你、有時又認唔到，有時又好清醒㗎喎，數到你帶咗幾多隻香蕉嚟呀，其實都幾似《黑玫瑰》（馮寶寶失憶角色）㗎，你咪將佢當成幽默啲咁去應對囉，有時佢問你係邊個呀？我話你話我係邊個咪邊個囉，佢又跟住笑喎！」
2003年心情好低落
李蕙敏89年與區海倫以組合Echo名義出道，事業高峯期要數她的怨婦三部曲《活得比你好》、《（你沒有）好結果》和《我為我生存》，是當年的K歌大熱；而人生的谷底，就在2003年。
「2003年嗰段時間，心情好低落，嗰時其實全香港個氣氛都好差啦，嗰年沙士，我自己爸爸又離開啦，呢個係最大嘅衝擊對我嚟講，跟住哥哥（張國榮）又走啦，梅姐（梅艷芳）又走啦，咁我自己又同一個拍咗好耐拖嘅男朋友完咗，事業又有好多嘢唔係自己控制到，有阻滯唔能夠依計劃去進行，所以都幾辛苦㗎嗰段時間。以前成日覺得，只要勤力畀心機盡力push，就會有好多嘢做到，但係其實有好多嘢係控制唔到！」
情緒最低落時期，李蕙敏選擇自閉家中不出外見人，「都係喊囉，因為好難走出嗰個情緒，太多困擾嘅事，即係點講呢，如果人相信命運，咁咪就係你唔好運嘅時候囉，咁梗係好辛苦啦，情緒好難走出嚟，唔想見人啦，咁我不嬲都唔係好同人contact。」
她說越來越覺得唔對路，「除咗唔想出街唔想見人，嗰時個氣氛又差（沙士），跟住個人開始好鍾意瞓覺，我以前覺得瞓覺係好嘥時間嘅事，咁就開始覺得好唔對路，驚自己有少少會進入咗嗰個位（抑鬱），變咗同自己講唔得喇，開始要見人喇，要見朋友，要開始識一啲新嘅朋友，識一啲絕對同我哋呢行冇關嘅人，我開始發現原來呢個世界好大㗎喎！」
今年是李蕙敏入行30年，她說仍有出唱片打算，而舞台劇，今年已接了兩套，除了年初的《單身．友．情人》，下月將演出《但願人長久》。她的老公，現在是她的頭號粉絲，「佢對我啲嘢好有興趣，好似佢好鍾意《Company》上次套戲，即係《單身．友．情人》，嗰個百老匯嘅戲，佢做晒功課睇吓講乜嘢，因為成場廣東話，佢都算叻㗎喇，睇晒廣東話，咁當然有好多嘢佢未必完全明得晒，我盡量解釋囉，咁佢都聰明嘅！」
知音人唔使多，最緊要有一個永遠在身邊。
【後記】6.16之後
訪問在6.16之後兩日進行，當日李蕙敏身體仍有點不適，她說：「我喺呢度土生土長，我係好愛呢個地方，尤其我係喺中環長大，我21歲先至搬出中環，我細細個成日去大會堂，個個禮拜去大會堂睇書睇展覽，唔開心又會去皇后碼頭，自己坐喺度聽歌……呢兩個星期有咁多事發生，我係好感觸，感覺好複雜。我記得有一晚，應該係9號嗰晚，我嗰幾日好唔舒服，又感冒又咳，跟住我先生返嚟，睇到電視，我就忍唔住攬住佢膊頭喊！」
李蕙敏講起上嚟都眼紅紅，「我希望祝福未來嘅香港，尤其係年輕人，因為講真我哋都大半世人啦，所以我都好希望未來會有一個好嘅景象，令到我哋嘅年輕人繼續喺呢個香港同世界繼續發光發熱，我好希望係咁囉！」
唔係得把口嘅，李蕙敏早已聯署和分享了「香港藝術及文化界工作者譴責警方暴力鎮壓聯署聲明」在自家facebook。嗱，冇「彈弓手」刪圖㗎！
髮型：Eddi So of headquarters salon
場地提供：柏寧酒店SKYE