星期日嘅歐U21決賽，上演上屆決賽嘅翻版西班牙鬥德國。結果，西班牙靠中場法比安彭拿同翼鋒丹尼奧姆各建一功，以2:1擊敗對手，成功報卻上屆決賽嘅一敗之仇，而俾皇家馬德里睇中嘅「狂牛」中場法比安彭拿，更贏得今屆賽事嘅最佳球員獎項。
改無鋒陣扭轉乾坤
西班牙同德國都係近年青訓最出色嘅國家，兩隊亦越戰越勇，4強分別4:1大勝法國，同埋4:2大勝羅馬尼亞，昂然晉身決賽。不過，決賽開波僅七分鐘，法比安彭拿一次禁區外遠射就搞掂德國門將紐布爾，幫狂牛開紀錄。其後德國大反攻，可惜一直未能扳平，下半場68分鐘西班牙一次反擊，法比安彭拿嘅遠射雖俾紐布爾撲出，但門前嘅丹尼奧姆趕到執雞，拉開至2:0。雖然尾段德國中場拿迪安阿美利，遠射省中人改變方向入網追近，但德國最終都以1:2飲恨。
西班牙最終贏得今屆歐U21冠軍，亦係第五度封王，平咗意大利嘅紀錄。反觀近年西班牙大國腳喺大賽嘅表現麻麻，而且人材唔似之前幾年咁接連湧現，仲有啲青黃不接。其實今屆歐U21狂牛首戰就以1:3不敵東道主意大利，爭冠不被看好，不過，狂牛之後改踢無鋒陣式。除此之外，五中場嘅陣式亦令西班牙有更大嘅控球優勢，戰力大幅提升，分組賽尾輪大勝波蘭5:0，同埋4強大勝法國4:1就睇到變陣嘅威力。最後亦成功用呢個陣擊敗強敵德國再度封王。
皇馬吼實MVP法比安
喺今屆賽事表現出色嘅西班牙中場法比安彭拿，過去一季喺拿玻里有唔少機會，今屆賽事佢全部踢晒，亦交出2入波2助攻，而決賽兩個入波都同佢嘅射門有關，絕對係最大功臣。對於獲選賽事MVP，法比安彭拿就指非常開心：「我哋第一場對意大利打得好差，令到今屆晉級路途困難重重，但球隊打出信心，最後我哋成功贏到冠軍。」早前已經有傳皇馬因為唔想俾保羅普巴拖住今夏嘅組軍進程，未來可能會將目光放喺法比安彭拿身上，今夏或者會羅致佢回歸西甲。