特區政府同特首林鄭月娥要一刀切全禁電子煙同加熱煙，呢個其實係反世界潮流，好多歐美國家都係想用電子煙同加熱煙取代傳統香煙，因為對非煙民影響較細。早排立法會舉行《2019年吸煙（公眾衞生）（修訂）條例草案》委員會會議，就通過暫緩禁止電子煙及加熱煙等新式煙草產品動議，而噚日7.1遊行亦出現大批嘲諷食物及衞生局局長陳肇始逼人食傳統香煙嘅宣傳海報，可謂叫林鄭下台以外最顯眼嘅海報。
有政界人士話，其實唔少政圈中人甚至官員都認為用一刀切全禁電子煙同加熱煙根本好難執行，年輕人隨時去深圳甚至淘寶買，根本禁唔到，就好似室內禁煙一樣，法就立咗，但有幾何深夜去酒吧執法？不過林鄭要討好班禁煙醫生同教育界，咪照立法囉！但以林鄭今日民望咁低，呢班禁煙醫生同教育界根本唔會撐佢，反而得罪一班食緊電子煙嘅市民！