噚日最多遊行人士高喊嘅一句口號，自然係「林鄭下台」，但如果林鄭下台，邊個上台先？呢條問題原來難倒唔少遊行人士，大家一被八方問到即時語塞。又係嘅，得嗰1,200人有份選，諗嚟好似多餘，但有遊行人士諗諗吓，就提出不如由鄺俊宇做特首。
市民：鄺神感覺到港人脈搏
遊行人士黎生建議畀民主派新星做特首，因為佢哋掌握到香港嘅民情，「畀鄺俊宇、朱凱廸試吓（做特首）吖，呢兩個人感覺到香港人嘅脈搏，知道前線要啲乜嘢，而唔係思想上比較守舊」。鄺神呢排成為大紅人，噚日朝喺分域碼頭一帶示威場地協調時，更化身暖男單手攬住安慰被嚇到喊嘅傷者：「鄺俊宇喺度，唔使驚，唔使驚。」八方提提大家，1983年出世嘅鄺神，2022年都40歲欠1，未夠秤選特首，相信佢嘅粉絲要失望嘞。
曾經參選特首嘅「薯片叔叔」、前財政司長曾俊華就有最多人揀佢接替林鄭。鄧先生直指其實邊個做特首都「三面不是人」，至於邊個比較似返個人？「暫時我諗係曾俊華，暫時咋喎。」劉先生亦贊成鬍鬚曾接任，覺得佢為民主派接受，較能代表港人聲音：「但我諗大陸唔會畀佢，因為佢係港英餘孽。」
劉小姐就話，其實邊個建制派上場做特首都係咁衰，但林鄭下台起碼可以減低社會撕裂，佢接受由「永恒特首黑馬」行會召集人陳智思頂上，「佢講嘢其實同葉劉淑儀差唔多，但個人比較真摯啲」。
鄺先生就似乎係踏實派，認為可由政務司長張建宗頂上。吓，張建宗？原來係想畀香港一段喘息空間再爭取普選，不過佢就比較心淡：「我贊同田少講，林鄭落唔落台唔係關鍵，而係行會要改組，起碼要有啲醒啲嘅人喺度。」
李八方