非國盃主辦國埃及，喺禮拜三A組第二輪分組賽對剛果民主共和國，賽前出現醜聞，中場艾馬華達因為被指喺社交媒體性騷擾女模而被逐出國家隊，好彩埃及喺利物浦前鋒穆罕默德沙拿有入波下，以2:0順利贏出，2戰2勝提早一輪晉級16強。
艾馬華達被逐離隊
埃及裔英國模特兒姬娜日前指控艾馬華達，向佢傳送唔恰當同埋具攻擊性嘅訊息，之後佢再跟進話有其他女性同佢接觸，表示都收到嚟自呢個球員但佢哋唔想收到嘅訊息，仲將證據分享出嚟。聽講由艾馬華達喺ig傳畀呢啲女性嘅相關訊息截圖同短片喺twitter被分享後，佢嘅不當行為成為埃及最熱門嘅話題。
部份訊息顯示，當女士們拒絕艾馬華達嘅挑逗，佢態度就即刻唔同晒，言論唔再同對方客氣兼好有攻擊性，結果喺要求埃及足總採取行動嘅呼聲越嚟越高嘅情況下，足總禮拜三宣佈為咗「維持紀律、承諾同專注」，將艾馬華達逐出國家隊。
沙拿入波埃及贏2:0
25歲嘅艾馬華達效力希臘球會PAOK，佢喺上個禮拜五埃及小勝津巴布韋1:0嘅A組首輪分組後備上陣，佢被踢出隊後，埃及得番22個球員出戰對剛果嘅第2輪非國盃分組賽，不過最終都順利贏波。
埃及今場同剛果踢成均勢，主隊雖然控球稍為多啲，但剛果嘅攻門次數就凌駕埃及。25分鐘，沙拿喺禁區外右路「K角位」傳中，令禁區內形成混戰，右閘艾穆罕默迪以腳面射入為埃及先開紀錄。踢到43分鐘，沙拿喺禁區內無視面前嘅兩位剛果守將，直接射近柱得手，協助埃及以2:0擊敗剛果。同組烏干達同津巴布韋踢成1:1，前者2戰得4分排喺A組第2位，最後一輪會挑戰已經出線嘅埃及。
至於同日較早時候舉行嘅一場B組分組賽，尼日利亞就以1:0小勝有利物浦中場拿比基達壓陣嘅幾內亞，2戰2勝得6分排喺榜首。