【地產專題】「遲買會貴」在樓市只升不跌的年代已植根港人腦海，90後、經營美容店的王小姐遲遲未出手，兩年多前聽聞同學買樓賺逾百萬元，「就係呢一年幾，我陀BB呢段期間，佢就已經賺咗百幾萬……」自覺錯失入市良機，產後才一個多月，碰巧經紀推銷啟德天寰，最終斥資740萬元買入一個兩房單位。
記者：陳家雄
王小姐2017年以約740萬元買入啟德天寰一個實用438方呎的兩房單位，呎價約1.7萬元，「呢層樓係我產後抑鬱時買。生完BB，唔可以返工，日日喺屋企，好唔開心。其實陀BB前都睇緊樓，後尾陀咗，就算啦，唔好搞咁多嘢。」產後與已做業主的中學同學閒聊，「我問佢：『你層樓點？』佢話買咗一年幾，就係呢一年幾，我陀BB呢段期間，佢就已經賺咗百幾萬……咁我就覺得，點解我又錯失咗呢個機會呢！呢個就係點解我要嗱嗱臨去買樓。」
後生輸得起 不怕負資產
她承認沒有買樓自住的逼切性，現與丈夫居於老爺奶奶中西區大單位，但她覺得：「樓市越來越高，你現時唔買，將來可能都好難買得起！」她續稱：「要跳出你的舒適圈，唔可以話有得住，你就去住。趁自己後生，可以輸！我要有我自己嘅嘢，所以就覺得應該要買樓。」對於香港曾出現負資產，她稱，「我哋叫初生牛犢不怕虎，我未經歷過（負資產），唔知佢有幾可怕。但講真，就算真係負資產，咁我都可以再賺返嚟，係嘛！」
資深驗樓師賴達明驗收她的單位，全屋門框收口位做得不足，其中主人房的門框空罅竟可攝入五元硬幣。單位有多處空心磚，包括露台天花兩塊、門底一塊、工作平台門底一塊。而且浴室鏡櫃一塊玻璃鬆脫，搖搖欲墜極危險，明哥指單位獲63分。
建灝發言人表示，關注承建商為個別單位進行工程造成遺漏或不完善，已經即時責成承建商按業主提交執漏清單進行修繕。