徐天佑自「反送中」事件後，早前將fb個人專頁換上全黑色頭像，表達哀痛，遭網民留言挑釁：「奀星做乜轉頭像？」天佑霸氣反擊：「關你X事！」毛記腦細林日曦留言撐他：「就當係奀星。奀，因為不大，保持赤子之心，就會自然發亮。」
工作失自我
昨日凌晨，天佑於社交平台再為「奀星」貼文：「奀星、明星、大星、巨星都係一個大眾幻覺。」他指自己屋邨出身，15、16歲入行時想做演員及音樂人，不過曾因工作失去自我，他說：「記得入行第一首歌，派台前一晚，我同監製講我之後會如常拖女朋友周街逛，點知首歌出街第二日，我就同記者講我冇拍拖，人類總會喺龐大外在壓力下自然地放下自我，然後有一日自我成熟，又有可能會擔心其他問題而繼續忘記自我，『自我』主要元素是人類互相間共通的價值觀。」
天佑坦言因為年輕人感動：「見到一班年輕人守護緊自我價值，我哋社會嘅價值而奮鬥。」他又斥：「喺我度留言『舉中指』嗰位朋友，點解佢嘅價值觀係咁，因為佢嘅價值觀同我哋唔同，佢覺得自己啱，所以我回覆佢乜嘢都冇用，唯一可以講就係『關佢叉事』！」他又指其實是關對方事。
網民讚敢言
最後天佑再為「奀星」解讀：「奀星？咁係咪星？天上面啲星？即係近地球啲？易捉摸啲？貼地啲？貼地啲咁咪好囉，因為我哋都係香港人。」他指所說的話只代表自己，但網民讚他有良心及敢言。
撰文：祖李