唔少藝人未紅前都食過唔少苦頭，入不敷支同受氣，差唔多係指定動作。好似近日憑阿伯角色討好而人氣急升嘅「開心哥」，真係捱咗幾十個寒暑至有今日。其實論外形，開心哥一啲都唔差，有身高有外貌，就係欠一個機會。回想未紅前，雖然經理人公司人面夠廣，都參加過唔少電影演出，不過從未受過重視，喺片場經常畀啲工作人員呼喝。
話說開心哥有次拍戲企錯位要NG，俾副導演單打佢唔識撈，又唔識走位，佢都要硬食。另外，因為片酬低收入少，令到開心哥養成節儉習慣。到今時今日出咗名，收入改善咗唔少，但係佢仍然奉行「慳得就慳」策略。
好似之前同富二代「大口仔」拍節目，論資排輩嚟講，開心哥好應該萬歲請食嘢，不過拍咁耐一次都未試過，反而大口仔就不時請食飯。拍完節目後，成班後生仔friend咗，經常孖住出嚟宣傳，成班人就同電影公司夾定，無論點都想開心哥萬歲。當晚做完宣傳，一班人去消夜，喺眾人起哄之下，開心哥終於失手，嗰餐埋單都要四位數字，對一向慳慣嘅開心哥嚟講，其實都好肉赤。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。