「金鱗豈是池中物，一遇風雲便化龍。」這兩句經典金句，大家耳熟能詳，但其實不是出自馬榮成，而是出自術數大師、「鐵板神算」董慕節之口，他早年為馬榮成算命作的批語，一語成真。
董慕節在上一輩人威名鼎鼎，他的外孫、29歲張存華卻沒有繼承衣鉢，美國留學返港後，改走截然不同的體育路，想為體育出一分力，曾為歐鎧淳、胡子彤做經理人，又跑去講波做NBA籃球主持，「我想話畀其他人聽，香港嘅sport show有好多過癮嘅地方。」公公批他可以振家聲，他則深信知天命，更要自強！
撰文：林妙萍
攝影：郭賢興
場地提供：Jamie Italian、Muay Thai Station
「我真係冇追過麥明詩，飲過吓咖啡係有，如果有追，好多人見到啦。」29歲陽光正氣的「華Dee」張存華，在銅鑼灣學打泰拳，預備正式打比賽。前年因和麥明詩傳出緋閒，被起底來自命理名家、「鐵板神算」董慕節外孫，「嗰次新聞一出，遠在美國嘅朋友都搵我，單新聞係比我做體育主持訪問，大100倍威力。」
家中常見VVIP
「鐵板神算」董慕節上世紀在圈中名聲顯赫而低調，翻查紀錄，出現過的星級客戶名字，有李嘉誠、倪匡、黃霑、張國榮、徐小鳳等，更傳有內地領導人。「細細個時已經feel到，因為食食吓飯，會叫『喂，走啦，入房喇。』原來係有啲VVIP要上來。」家中常有巨星名人到訪，幾歲由李連杰抱住，紀念冊也是金庸題字「前程遠大、希望無窮」，至於外界最熟的兩句「金鱗豈是池中物，一遇風雲便化龍」，「嗰時黃玉郎同屋企好熟，成日拜候公公，介紹咗馬榮成嚟，後來我入戲院睇《風雲：雄霸天下》，媽咪話，你要記住呢句，係媽咪寫畀馬榮成。」
在香港開心過童年，張存華去到美國讀大學突然變了天，華人學生備受歧視，也令他雖然苦讀金融，畢業後卻改投體育之路，「美國唔係樣樣咁文明，紐約都有少少歧視，何況印第安納州？喺大學俾人掟波、俾人寸，去到最後一年，我哋全華人隊勝出咗一個重要本地聯賽，先得到人哋尊重。但係報章仲係形容我哋係Asian-American，華裔美國人，其實係唔啱。呢樣嘢令到我要做體育行業，做啲新事出嚟。」因打籃球得到身份認同、文化認同，張存華希望提升運動員的社會形象、商業認受性。2015年回港後，做完運動品牌公關，再做港台體育主持人，跑新聞、做NBA評判等，更負責香港頂尖運動員，如胡子彤等的經理人工作，「Manage二十幾個運動員，嗰時個待遇冇得彈，但始終我後生，未夠經驗，湊住佢哋真係好辛苦。」
自豪訪問K獲加
搵錢少，挫折多，張存華坦言當時自覺好「兜踎」，幸好個人正面上進，思前想後先做好自己，「公公喺我最迷惘時，講咗兩句：『勇敢創新紀，立志振家聲。』做人一定要自強，我仲想話畀其他人聽，香港嘅sport show有好多過癮地方，就算有幾少人睇NBA嘅廣東話評述都好，你肯做好功課，一樣可以建立到自己嘅粉絲。」
聲線不夠靚？講得激情活潑些；項目專業不足？逐樣學，籃球、拳擊、游泳、劍擊；廣東話講波搞掂，張存華再操雙語評述，「Sky is my limit，舊年內地籃球全明星賽，廣東省千幾萬人，我哋係唯一成功訪問到K獲加（Kemba Walker）。下一步，我好想做下年東京奧運，呢個喺運動界嚟講，就好似奧斯卡咁重要。」
講運動停不到口，心痛香港沒有了林書豪、周杰倫的籃球明星賽，心中偶像是由平凡人靠自己走上頂𥧌的高比拜仁（Kobe Bryant）、甄子丹等。平凡靚仔講波佬，張存華去名牌活動，試過前一秒俾人白眼冷待，下一秒外人知他有猛料公公就360變臉，只求booking，現實世界就是如此，問到如何推？他說：「我通常都話，公公都九十幾歲，唔好搞佢喇。」
張存華（Emil）
暱稱：華Dee
年齡：29歲
學歷：Purdue University金融學系
背景：鐵板神算董慕節外孫
現職：港台節目《體壇無極限》主持
【指引做個好人】
公公董慕節屬祖師級命理大師，現今成名玄學師傅大多名成利就，張存華先天背景比人強，何解要行條辛苦路？「搵錢艱難時有諗過學術數，但自問文化底蘊完全跟唔上。公公不單止術數、數學叻，文化、畫、字啦，各方面我都match up唔到。」
張存華眼中，公公是古代人，準到連婆婆要開幾多次刀做手術都算到；同時公公是他的心理訓導師、人生導師，「佢有同我講過，我有兩個行業去搵食，但冇同我講邊兩個行業，叫自己摸索吓，總之『不可不讀（書）』，要孝順、愛國、對朋友有義氣。」自強不息，做個好人，就是人世間最大的真理。
更多精采時尚內容，盡在 http://add.appledaily.com。