王敏德（Michael）同老婆馬詩慧（Janet）有三個仔女，大女王曼喜同細女王麗嘉都鍾意騷身材，搞到老竇王敏德都話尷尬，而個樣似足阿媽嘅孻仔王躍穎（Kadin）今年都已經19歲，佢唔單止遺傳咗爸爸嘅高大身形，6呎高兼有40吋胸肌，仲遺傳埋爸爸嘅花心，Kadin曾經喺一個訪問度自爆花心是得自爸爸嘅遺傳，不過最後補充話：「爸爸只係以前花心，𠵱家唔係喇！佢教我識女仔，但要專一。」
唔否認戀情
Kadin其實都好有異性緣，三年前自爆同拍拖三個月嘅女友Mimi閃電分手後，話都冇咁快又見佢同個長髮女夜蒲，最近佢又喺Ig晒同新女合照。之前見Kadin身邊嘅女友都係中國人臉孔，原來佢今次轉咗口味，識咗個芬蘭女仔Inka，Kadin仲將佢哋嘅畢業晚宴相放上網，Kadin肉緊攬住女方條腰，唔少朋友留言恭喜兼讚佢哋好襯，Kadin都回應：「Thank you」而且冇否認戀情。
從相中所見，Inka身材豐滿，好有肉地，佢喺社交網度仲貼咗唔少泳照，Kadin除咗畀like，仲唔怕肉麻咁讚女友：「美麗前衞的你」，兩人又在網上隔空打情罵俏。不過前日父親節，Kadin就好乖仔陪爸爸王敏德慶祝。
撰文：馮仁昭