女士愛穿短裙消暑，但要慎防走光。第九年公佈走光黑點嘅民建聯今年又揀出12個走光黑點，新啟用嘅戲曲中心、高鐵西九站成走光重災地帶，仲有北角長康街Starbucks及九巴玻璃梯巴士等。
《蘋果》噚日現場視察，發現西九高鐵站通往B1層另一邊食肆嘅走廊，係走光黑點，落地玻璃冇貼上磨砂膠紙，無遮無掩，只要市民企喺對面就可能睇到女士走光。雖然B1層售票大堂同一樓玻璃圍欄都貼咗圓點貼紙，但都幾疏落，穿短裙女士仍有可能洩春光。
港鐵︰玻璃牆身已貼磨砂圓點
戲曲中心內嘅玻璃圍欄，都有機會畀同層或下層嘅人睇到裙底。至於長康街Starbucks，着短裙坐近玻璃幕牆就容易走光。
民建聯婦女事務委員會主席葛珮帆話，近月收到多宗關於九巴玻璃樓梯巴士投訴，有女士直言唔敢着短裙行上上層。
港鐵回覆話多個車站已採取措施，如西九站，主要玻璃牆身位置已貼上磨砂圓點，仲會探討增加不透明貼紙可行性。九巴回覆話新款巴士經嚴格安全檢查，獲運輸署批准才用，會繼續聆聽意見改善設計。