歐洲議會選舉啱啱喺星期日結束投票，投票率創咗20年新高。雖然呢件國際事件，好似同香港無關，但其中一位投票人，就將事件添上唔少香港色彩，皆因德國科隆市長Andreas Wolter當日着咗件寫有「和平佔中」字樣同標誌嘅tee為歐洲議會選舉投票，佢喺facebook留言，話藉此紀念所有其他地方無票可投嘅人，並將呢個問候送畀喺中國同香港嘅朋友，認真有心。
朱牧16年所贈
到底佢呢件佔中tee，喺邊度得嚟？查實係同佔中案被告之一、獲判緩刑嘅朱耀明有關。仲記唔記得朱牧喺2016年獲德國福音基督教會科隆市基督教教區頒授Pfarrer-Georg-Fritze紀念獎呢？當時朱牧就送咗呢件tee畀市長做紀念品，朱牧都話估唔到，對方會喺歐洲議會投票時着呢件tee，覺得意義好大，而當年朱牧攞獎時即席舉黃傘，Andreas Wolter都喺現場見證。
李八方