仁濟醫院前主席嚴玉麟的女兒嚴紀雯下月出嫁，跟家族經營建材生意的男友Jeffrey在灣仔舉行百萬婚禮。將為人妻的嚴紀雯日前受訪，透露用了一年半時間籌備婚禮，「婚禮嘅主題叫紫色遊園夢，我同Jeffrey商量過，想將場地打造成一個小小嘅花園，婚姻好似花園咁，要慢慢去經營。」她自覺一直好幸福，現在連終身伴侶也找到，人生圓滿。
撰文：羅慧敏
攝影：林德雄
場地提供：AMMO Restaurant and Bar
談起籌備中的婚禮，30歲的嚴紀雯自言心情好緊張，「始終係人生一樣好重要嘅事，我對所有嘢嘅要求都高，希望所有嘢都好好睇睇，大家有一個不一樣嘅晚上。」
姊妹團強勁
婚禮的六位姊妹團成員份量十足，包括伴娘文詠珊（JM）、姊妹有賭王千金何超盈及「麻雀館大王」石鑑輝家族後人石佩藍等。提到3月時於泰國曼谷舉行的bridal shower，嚴紀雯指這是她人生中最開心的旅程，她說：「我真係覺得好幸福，有呢班咁好嘅朋友，我係一個唔容易俾人了解到嘅人，佢哋真係好了解我，好sweet、好感動。」
父母成模範
嚴紀雯的父母相戀46載，愛情經歷成為了她的模範，嚴紀雯說：「我父母13、14歲開始拍拖，大家都係初戀，佢哋到𠵱家關係都好好，我哋成日都會一家人一齊，爹哋係一個好顧家嘅人，所有嘢都照顧得好周詳，係好幸福，以佢哋為榜樣絕對係好啱嘅形容詞。對我嚟講一段婚姻大家要互相扶持，呢個好緊要，我知道一定有好多考驗，開心嘅時候一齊過，唔開心嘅時候一齊過。」婚後她將到南非度蜜月，過一輪二人世界後才實行生B大計。
提到未婚夫Jeffrey，嚴紀雯大讚對方細心，二人相識兩星期便拍拖，拍拖一年半已認定對方。嚴紀雯直言不算浪漫的Jeffrey去年2月炮製一場驚喜求婚，令她招架不來，她憶起當時情境時笑說：「我哋去咗LA旅行，有一晚佢話約咗個朋友食飯，到咗酒店𨋢門一開我就見到自己啲相，由嗰一刻我個腦就完全空白，冇晒印象，直到戴戒指，真係嚇親，太驚訝！」對於相處之道，嚴紀雯說：「其實我哋都係好理性嘅人，由拍拖到𠵱家都未鬧過交，大家feel到個人竧𣉢就行開啲，再講番啲嘢令大家紓緩番。我都唔係一個太衝動嘅人，所有嘢都可以講出嚟，鬧交好傷感情，所以大家真係好夾，搵啱人。」
要貢獻社會
嚴紀雯小學讀女拔萃，之後到英國讀書，畢業於倫敦經濟學院社會學系的她，現於國際地產大行任投資部副董事，婚後她沒打算停下來，她說：「我係一定要做嘢嘅人，唔可以同社會脫節。」她指哥哥嚴子杰和弟弟嚴子諭已替父親打理家族生意，自己沒有半點壓力，可做喜歡做的事，「一直都覺得自己好幸福，但永遠少咗愛情嗰部份，自從Jeffrey求婚之後，有埋終身伴侶，佢連我缺乏嗰部份都填滿咗，已經圓滿。」
父母均曾擔任仁濟醫院主席，嚴紀雯也替家族接棒行善，成為總理，她說：「爹哋媽咪教落要做好自己本份，有能力就要貢獻社會，可以幫到人就幫，𠵱家仁濟都有去探訪，媽咪set up咗個項目叫愛心小天使，我鍾意同啲小朋友一齊去探訪老人家、派福袋，見到佢哋咁開心，自己都好開心。呢啲要由細灌輸畀小朋友，非常有意義，將來我教導小朋友都會係咁。」
最捨不得媽咪
嚴紀雯婚後將搬離娘家，跟母親關係非常要好的她一想起便不捨，她說：「已經開始唔捨得爹哋媽咪，尤其係媽咪，我哋由細到大關係都好close，close到一個位係如果我返工唔同佢講bye bye，佢會話我，每晚返屋企一定會有兩個傾偈嘅時間。我去咗英國讀書10年，未試過超過兩日冇通電話，感情好深厚。」
學會對人真
即將嫁人，嚴紀雯指媽咪有叮囑她要管理好家庭，她說：「因為媽咪管理屋企係100分，如果我做到佢嘅一半已經好犀利，希望我可以做一個好媽咪、好老婆。」身為富豪千金，她沒有半點驕縱傲慢，反而有禮、謙虛，全因父母影響了她，嚴紀雯說：「我生活層面上有好多唔同嘅朋友，做朋友完全唔應該有階級觀念，要對人真，我都係對人真心、好直接嘅人，做朋友係要用時間維繫。我媽咪係完全唔怕蝕底嘅人，完全唔計較，零脾氣，我身邊最close嗰個人成日都係咁嘅時候，我多多少少都學到嘅。」
更多精采時尚內容，盡在 http://add.appledaily.com。