政府建議修訂《逃犯條例》嚇到商界心慌慌，2014年被澳門裁定貪污等罪成判監5年3個月嘅富商劉鑾雄（大劉）早前向高等法院申請司法覆核許可，挑戰修例，講到明修例通過隨時被迫流亡海外，外界都好關注同案另一被判罪成刑期一樣嘅南華前足主羅傑承又點樣諗？
澳門官司後「仲好活躍」
羅傑承一直冇公開講過佢點睇《逃犯條例》修訂，係咪好似大劉咁怕通過之後要離開香港？八方噚日喺中華出入口商會傳媒午宴見到同羅份屬友好嘅足總副主席貝鈞奇，就梗係問佢知唔知羅傑承點睇呢件事，貝鈞奇透露近日有問候過羅傑承，話對方冇乜特別狀況；至於羅傑承會唔會都提司法覆核？貝就覺得大劉經已向政府挑機，仲使乜羅傑承出手，同一單案嘛！
貝鈞奇又透露，即使澳門案件有裁決後，羅傑承都仲好活躍，冇乜受影響，「賀歲盃咪佢搞囉」，最近仲喺馬會遇到對方，但由於佢早前已經冇咗馬會會籍，連啲馬都轉晒名，喺家去馬會都要個女幫手簽出簽入。咁羅傑承有冇透露日後有所擔心，或要離港？貝鈞奇就話：咁就唔知咯！
李八方